മലപ്പുറം: ഇതരസംസ്ഥാന തൊഴിലാളികളെ മലയാളം പഠിപ്പിക്കുന്ന 'ചങ്ങാതി' പദ്ധതിയുടെ ആദ്യ ബാച്ചിനു നവംബര്‍ 25നു പരീക്ഷ. സംസ്ഥാന സാക്ഷരതാ മിഷന്റെ വേറിട്ട പദ്ധതിയില്‍ 263 പഠനകേന്ദ്രങ്ങളിലായി 7,013 തൊഴിലാളികളാണ് പരീക്ഷയെഴുതാനൊരുങ്ങുന്നത്.
ഇതില്‍ 6,475 പുരുഷന്‍മാരും 538 സ്ത്രീകളുമാണുള്ളത്. മലയാളവും ഹിന്ദിയും ചേര്‍ത്തൊരുക്കിയ 'ഹമാരി മലയാളം' എന്ന സാക്ഷരതാ പാഠാവലിയാണ് 'ചങ്ങാതി' സിലബസ്. എറണാകുളം പെരിമ്പാവൂരിലാണ് പ്രഥമ ബാച്ച് തുടങ്ങിയത്. ഇതിനു മികച്ച പ്രതികരണം ലഭിച്ചതോടെ പദ്ധതി സംസ്ഥാന വ്യാപകമാക്കി. എറണാകുളം ഒഴികെയുള്ള 13 ജില്ലകളില്‍ കഴിഞ്ഞ ഏപ്രില്‍ ഒന്നുമുതല്‍ ഓരോ ചങ്ങാതി ബാച്ചുകള്‍ പ്രവര്‍ത്തിക്കുന്നുണ്ട്. ഇവിടങ്ങളിലെ പഠിതാക്കളാണ് രണ്ടു മാസത്തിനു ശേഷം പരീക്ഷയെഴുതുന്നത്.
തിരുവനന്തപുരം കഴക്കൂട്ടം 368, കൊല്ലം പെരിനാട് 317, പത്തനംതിട്ട കോഴിപ്പുറം 404, ആലപ്പുഴ മണ്ണഞ്ചേരി 275, കോട്ടയം പായിപ്പാട് 620, ഇടുക്കി കരിക്കുന്നം 441, തൃശൂര്‍ ചാവക്കാട് 394, പാലക്കാട് പുതുശ്ശേരി 1,711, മലപ്പുറം പെരിന്തല്‍മണ്ണ 867, കോഴിക്കോട് നരിക്കുനി 316, കണ്ണൂര്‍ ചിറക്കല്‍ 777, വയനാട് മൂപ്പൈനാട് 211, കാസര്‍കോട് മഞ്ചേശ്വരം 312 എന്നിങ്ങനെയാണ് പ്രഥമ ബാച്ചിലെ പഠിതാക്കളുടെ എണ്ണം.
ആരോഗ്യം, ഭക്ഷണം, മാര്‍ക്കറ്റ്, ഹോട്ടല്‍, യാത്ര, തൊഴില്‍ തുടങ്ങി 25 പാഠങ്ങളാണ് ഹമാരി മലയാളം പാഠപുസ്തകത്തിലുള്ളത്. പഠിതാക്കളെ ആകര്‍ഷിക്കാന്‍ ഡിജിറ്റല്‍ പാഠപുസ്തകവും ചില കേന്ദ്രങ്ങളില്‍ ഉപയോഗിക്കുന്നുണ്ട്. ആഴ്ചയില്‍ അഞ്ചു മണിക്കൂറാണ് ക്ലാസ്. വിദ്യാകേന്ദ്രങ്ങള്‍, ലൈബ്രറികള്‍, സ്‌കൂളുകള്‍, മറ്റു പൊതുസ്ഥാപനങ്ങള്‍, തൊഴിലാളികളുടെ താമസ സ്ഥലങ്ങള്‍, തൊഴിലിടങ്ങള്‍ എന്നിവ പഠന കേന്ദ്രങ്ങളാണ്. 100 മാര്‍ക്കിനാണ് പരീക്ഷ.
രണ്ടാമത്തെ ബാച്ച് ഡിസംബര്‍ 20ന് തുടങ്ങും. പദ്ധതിയിലൂടെ ഇതരസംസ്ഥാന തൊഴിലാളികള്‍ക്കിടയില്‍ പ്രകടമായ മാറ്റങ്ങളുണ്ടാക്കാന്‍ സാധിച്ചതായി സാക്ഷരതാമിഷന്‍ ഡയരക്ടര്‍ ഡോ. പി.എസ് ശ്രീകല പറഞ്ഞു.