തിരൂര്‍: പ്രളയത്തെ തുടര്‍ന്ന് തീരദേശങ്ങളില്‍ അടിഞ്ഞുകൂടിയത് വന്‍ മാലിന്യക്കൂമ്പാരം. പ്ലാസ്റ്റിക് കുപ്പികളും കവറുകള്‍ക്കും പുറമെ ചപ്പുചവറുകളുമാണ് തീരദേശങ്ങളില്‍ പലയിടങ്ങളിലായി അടിഞ്ഞുകൂടിയത്. മത്സ്യത്തൊഴിലാളി കുടുംബങ്ങള്‍ സ്ഥിരമായി ആശ്രയിക്കുന്ന കടപ്പുറങ്ങളിലും പ്രാദേശിക ടൂറിസം കേന്ദ്രങ്ങളിലും മാലിന്യങ്ങള്‍ നിറഞ്ഞതാണ് കൂടുതല്‍ പ്രയാസമായത്. കടലിനോട് ചേര്‍ന്ന് താമസിക്കുന്ന മത്സ്യത്തൊഴിലാളി കുടുംബങ്ങളുടെ വീടുകളിലേക്ക് പോലും പ്രളയത്തിന് തൊട്ടുപിന്നാലെ വ്യാപകമായ തോതില്‍ മാലിന്യങ്ങള്‍ ഒഴുകിയെത്തിയിരുന്നു.
ഏറെ പ്രയാസപ്പെട്ടാണ് വീടുകള്‍ പിന്നീട് ശുചീകരിച്ചത്. നല്ലനിലയില്‍ വിനോദ സഞ്ചാരികളെത്തുന്ന കൂട്ടായി പടിഞ്ഞാറെക്കര ടൂറിസം ബീച്ചിലും പ്രളയത്തെ തുടര്‍ന്ന് കിലോമീറ്ററുകള്‍ ദൂരത്തില്‍ കടപ്പുറത്ത് മാലിന്യം അടിഞ്ഞിരുന്നു. ഈ മാലിന്യങ്ങളെല്ലാം ടൂറിസം ബീച്ചിലെ ജീവനക്കാര്‍ എടുത്തുമാറ്റി ശുചീകരിക്കുകയാണിപ്പോള്‍. ടൂറിസം ദിനാഘോഷത്തിന് മുമ്പ് പടിഞ്ഞാറെക്കര ബീച്ച് ശുചീകരിക്കാനാണ് ശ്രമം.