കല്‍പ്പറ്റ: ജില്ലയില്‍ ആദ്യമായി നടക്കുന്ന വ്യോമസേന റിക്രൂട്ട്‌മെന്റ് റാലിക്ക് വ്യാഴാഴ്ച തുടക്കമാവും. കല്‍പ്പറ്റ എസ്.കെ.എം.ജെ സ്‌കൂളിലാണ് റാലി നടക്കുക.
വടക്കന്‍ ജില്ലയില്‍ നിന്നുള്ള 2500റോളം പേരാണ് റാലിയില്‍ പങ്കെടുക്കുന്നത്. വയനാട് ജില്ലയില്‍ നിന്ന് 400റോളം പേര്‍ രജിസ്റ്റര്‍ ചെയ്തിട്ടുണ്ട്. നാളെ മുതല്‍ 30 വരെയാണ് റിക്രൂട്ട്‌മെന്റ് റാലി.
ഓട്ടോ ടെക്‌നീഷന്‍, ഗ്രൗണ്ട് ട്രെയിനിങ് ഇന്‍സ്‌പെക്ടര്‍, ഇന്ത്യന്‍ എയര്‍ ഫോഴ്‌സ് പൊലിസ്, മെഡിക്കല്‍ അസിസ്റ്റന്റ് എന്നീ തസ്തികകളിലേക്കാണ് സെലക്ഷന്‍ റാലി നടത്തുന്നത്. റാലിയുടെ സുഗമമായ നടത്തിപ്പിനായുള്ള ഒരുക്കങ്ങള്‍ കല്‍പ്പറ്റ എസ്.കെ.എം.ജെ.സ്‌കൂളില്‍ ജില്ലാ ഭരണകൂടം ഏര്‍പ്പെടുത്തിയിട്ടുണ്ട്. മുന്നൊരുക്കം വിലയിരുത്താനായി കലക്ടറുടെ ചേംബറില്‍ ബന്ധപ്പെട്ട വകുപ്പു മേധാവികളുടെ യോഗം ചേര്‍ന്നു.
1997 ജൂലൈ ഏഴിനും 2000 ഡിസംബര്‍ 20നും ഇടയില്‍ ജനിച്ച പ്ലസ്ടു പാസായ ഉദ്യോഗാര്‍ഥികള്‍ക്ക് വേണ്ടിയാണ് റിക്രൂട്ട്‌മെന്റ് റാലി നടത്തുന്നത്.അവസരം പ്രീരജിസ്‌ട്രേഷന്‍ ചെയ്തവര്‍ക്ക് മാത്രമായിരിക്കും.