മഞ്ചേരി: 26 തത്തകളെ വില്‍ക്കാനെത്തിയ തമിഴ്‌നാട് സ്വദേശി എക്‌സൈസിന്റെ പിടിയിലായി. തിരുപ്പൂര്‍ അവിനാശ് താലൂക്കിലെ രേയപൂര്‍ അണ്ണാദുരൈയാ(48)ണു പിടിയിലായത്.   ഇന്നലെ രാത്രി മലപ്പുറത്തെത്തിയ മധുര-കണ്ണൂര്‍ സൂപ്പര്‍ഫാസ്റ്റില്‍ നിന്നാണു മഞ്ചേരി എക്‌സൈസ് സര്‍ക്കിള്‍ ഇന്‍സ്‌പെക്ടറും സംഘവും തത്തകളെ പിടികൂടിയത്.  സ്ഥിരമായി തത്തകളെ വില്‍പനക്കെത്തിക്കുന്നയാളാണ് അണ്ണാദുരൈ എന്നും ഇതുവരെ 15 തവണയായി ഇയാള്‍ തത്തകളുമായി ഈ റൂട്ടില്‍ സഞ്ചരിച്ചിട്ടുണ്ടെന്നും  എക്‌സൈസ് വകുപ്പ് അധികൃതര്‍ പറഞ്ഞു. തത്ത ഒന്നിന് 500 രൂപക്കാണു വില്‍പന നടത്തുന്നത്. തത്തകളെയും പ്രതിയെയും കൊടുമ്പുഴ ഫോറസ്റ്റ് റെയ്ഞ്ച് ഓഫിസിലെത്തിച്ച് അധികൃതര്‍ക്കു കൈമാറി.
സര്‍ക്കിള്‍ ഇന്‍സ്‌പെക്ടര്‍ വേലായുധന്‍ കുട്ടി, റെയ്ഞ്ച് ഓഫിസര്‍ ശ്രീകാന്ത്, സിവില്‍ എക്‌സൈസ് ഇന്‍സ്‌പെക്ടര്‍മാരായ രഞ്ജിത്ത്, രാധാകൃഷ്ണന്‍, ഡ്രൈവര്‍ സന്തോഷ്‌കുമാര്‍ എന്നിവരും സംഘത്തിലുണ്ടായിരുന്നു.