കല്‍പ്പറ്റ: പ്രളയബാധിത ദുരിതാശ്വാസ പ്രവര്‍ത്തനത്തിന്റെ ഭാഗമായി കല്‍പ്പറ്റ പൊന്നടയിലെ ടി.കെ രുഗ്മിണിക്ക് സ്‌നേഹ വീട് നിര്‍മിച്ച് നല്‍കി.
കല്‍പ്പറ്റ സോണ്‍ ലേബര്‍ കോണ്‍ട്രാക്ട് കോപ്പറേറ്റീവ് സൊസൈറ്റിയാണ് കാലവര്‍ഷത്തില്‍ വീട് നഷ്ടപ്പെട്ട രുഗ്മിണിക്ക് വീട് നിര്‍മിച്ച് നല്‍കിയത്.
കല്‍പ്പറ്റ മുനിസിപ്പല്‍ ഒന്നാം ഡിവിഷന്‍ കൗണ്‍സിലറാണ് ടി.കെ രുഗ്മണി. പതിനൊന്ന് വര്‍ഷം മുന്‍പ് ഭര്‍ത്താവ് അനന്തന്‍നായര്‍ മരണപ്പെട്ടിരുന്നു. നാല്‍പ്പത് വര്‍ഷം മുന്‍പ് പച്ചക്കട്ടയില്‍ നിര്‍മിച്ച ചെറിയൊരു വീട് ചിതല്‍ അരിച്ചതിനെ തുടര്‍ന്ന് തകര്‍ന്നു. പിന്നെ കഴിഞ്ഞ ഒന്നര വര്‍ഷമായി ഒരു ചെറിയ ഷെഡിലായിരുന്നു താമസം. അതാണ് കഴിഞ്ഞ കാലവര്‍ഷത്തില്‍ നിലം പൊത്തിയത്. ഇതോടെ രുഗ്മിണിക്ക് വീടില്ലാതായി. ഇതേ തുടര്‍ന്നാണ് കല്‍പ്പറ്റ സോണ്‍ ലേബര്‍ കോണ്‍ട്രാക്ട് കോപ്പറേറ്റീവ് സൊസൈറ്റി വീട് നിര്‍മിച്ച് നല്‍കാന്‍ തീരുമാനിച്ചത്.
വീടിന്റെ താക്കോല്‍ദാനം സി.കെ ശശീന്ദ്രന്‍ എം.എല്‍.എ നിര്‍വഹിച്ചു. പൊന്നടയില്‍ നടന്ന ചടങ്ങില്‍ സൊസൈറ്റി പ്രസിഡന്റ് യു വേണുഗോപാല്‍ അധ്യക്ഷനായി. അബ്ദുള്‍ റഷീദ്, വെങ്ങപ്പളളി ഗ്രാമ പഞ്ചായത്ത് പ്രസിഡന്റ് പി.എം നാസര്‍, സംഘം വൈസ് പ്രസിഡന്റ് കെ മുഹമ്മദ് കുട്ടി സംസാരിച്ചു. സംഘം ഡയരക്ടര്‍ സുനില്‍കുമാര്‍ സ്വാഗതവും സെക്രട്ടറി നിതിന്‍ സണ്ണി നന്ദിയും പറഞ്ഞു.