ആലപ്പുഴ: ആയിരം നിര്‍ധന വിദ്യാര്‍ഥികള്‍ക്ക് സൗജന്യമായി വസ്ത്രവും പഠനോപകരണങ്ങളും നല്‍കുന്നതിന് കേരള ബസ് ട്രാന്‍സ്‌പോര്‍ട്ട് അസോസിയേഷന്‍ ജില്ലാ കമ്മിറ്റിയുടെ ആഭിമുഖ്യത്തില്‍ കാരുണ്യയാത്ര നടത്തും.
പി. കൃഷ്ണപിള്ള സ്മാരക ജനകീയ ട്രസ്റ്റുമായി ചേര്‍ന്നാണ് പരിപാടി സംഘടിപ്പിക്കുക. നാളെ നഗരത്തിലെ പ്രധാന റൂട്ടുകളില്‍ സ്വകാര്യബസുകളില്‍ യാത്ര പൂര്‍ണമായും സൗജന്യമായിരിക്കും. യാത്രക്കാര്‍ യാത്രാക്കൂലിയും അവരുടെ സഹായവും ചേര്‍ത്ത് പണമായോ വസ്ത്രമായോ പഠനോപകരണങ്ങളായോ പ്രത്യേകം തയാറാക്കിയിട്ടുള്ള പെട്ടികളില്‍ നിക്ഷേപിക്കണമെന്ന് അസോസിയേഷന്‍ ജില്ലാ പ്രസിഡന്റ് പി.ജെ കുര്യന്‍ പറഞ്ഞു.
ഇരട്ടക്കുളങ്ങര, കഞ്ഞിപ്പാടം, സ്വകാര്യബസ് സ്റ്റാന്റ്, മണ്ണഞ്ചേരി, റെയില്‍വേ സ്‌റ്റേഷന്‍, കലവൂര്‍, ആസ്പിന്‍വാള്‍ എന്നീ പോയിന്റുകള്‍ കേന്ദ്രീകരിച്ചാണ് കാരുണ്യയാത്ര. വാര്‍ത്താസമ്മേളനത്തില്‍ എസ്. നവാസ്, എസ്.എം നാസര്‍ തുടങ്ങിയവര്‍ പങ്കെടുത്തു