തൃശൂര്‍: കുതിരാനില്‍നിന്ന് ബൈക്കില്‍ കടത്തിയ ആറ് കിലോ കഞ്ചാവ് തൃശൂര്‍ എക്‌സൈസ് സര്‍ക്കിള്‍ ഇന്‍സ്‌പെക്ടറുടെ നേതൃത്വത്തിലുള്ള സംഘം പിടികൂടി. കഞ്ചാവ് കടത്തിയ രണ്ടംഗ സംഘത്തിലെ ഒരാള്‍ പിടിയില്‍.
പുതുക്കാട് തെക്കേതൊറവ് ചെന്തറ വീട്ടില്‍ ജിബിന്‍ (20) ആണ് പിടിയിലായത്. കൂടെയുണ്ടായിരുന്ന കുറുമാലി വടക്കേടത്ത് വിഷ്ണു ഓടിരക്ഷപ്പെട്ടു.
തൃശൂര്‍ എക്‌സൈസ് ഇന്റലിജന്‍സും എക്‌സൈസ് സര്‍ക്കിള്‍ പാര്‍ട്ടിയും സംയുക്തമായി നടത്തിയ പരിശോധനയിലാണ് കഞ്ചാവ് പിടികൂടിയത്. തൃശൂരില്‍ സമീപകാലത്തായി കഞ്ചാവും ചരസും ഹാഷിഷും അടക്കമുള്ള ലഹരി വസ്തുക്കള്‍ എക്‌സൈസ് തുടര്‍ച്ചയായി പിടികൂടിയിരുന്നു. എക്‌സൈസ് സി.ഐ എസ് ഷിജു, പ്രിവന്റീവ് ഓഫിസര്‍മാരായ എം.ജി അനൂപ്, റിന്റോ ആന്റണി, കെ.എസ് ഷിബു, വഹാബ്, അനന്തന്‍, മോഹനന്‍, സിവില്‍ എക്‌സൈസ് ഓഫിസര്‍ ബെന്നി എന്നിവര്‍ കഞ്ചാവ് പിടികൂടിയ സംഘത്തിലുണ്ടായിരുന്നു.