തിരുവനന്തപുരം: ദാരിദ്ര്യരേഖക്ക് താഴെയുള്ളവരെ വൈദ്യുതി ചാര്‍ജ് വര്‍ധനവില്‍ നിന്ന് ഒഴിവാക്കിയെങ്കിലും കര്‍ഷകരെ വെറുതെവിട്ടില്ല.
കൃഷി ആവശ്യത്തിന് വെള്ളം പമ്പ് ചെയ്യുന്നതിനും കോഴി, കന്നുകാലി വളര്‍ത്തല്‍, അലങ്കാര മത്സ്യകൃഷി തുടങ്ങി കൃഷിക്ക് വൈദ്യുതി ഉപയോഗിക്കുന്നവര്‍ക്കെല്ലാം ഫിക്‌സഡ് ചാര്‍ജ് നിലവിലുള്ള എട്ട് രൂപയില്‍നിന്ന് 10 രൂപയായി ഉയര്‍ത്തുകയും എനര്‍ജി ചാര്‍ജില്‍ യൂനിറ്റിന് 30 പൈസ വീതം കൂട്ടുകയും ചെയ്തു. ധാന്യം പൊടിക്കുന്ന മില്ലുകള്‍, വര്‍ക്‌ഷോപ്പുകള്‍, ചെറുകിട സംരംഭങ്ങള്‍ തുടങ്ങി പരമാവധി 10 കിലോവാട്ട് വൈദ്യുതി ഉപയോഗിക്കുന്നവര്‍ക്കുള്ള പ്രതിമാസ ഫിക്‌സഡ് ചാര്‍ജ് 100 രൂപയില്‍നിന്ന് 120 രൂപയായി ഉയര്‍ത്തിയപ്പോള്‍ എനര്‍ജി ചാര്‍ജില്‍ വര്‍ധന വരുത്തിയിട്ടില്ല. ഈ വിഭാഗത്തില്‍ 20 കിലോവാട്ട് വരെ ഉപയോഗിക്കുന്നവര്‍ പ്രതിമാസം നല്‍കേണ്ട തുക 75 രൂപ തന്നെയായി നിലനിര്‍ത്തിയപ്പോള്‍ എനര്‍ജി ചാര്‍ജ് യൂനിറ്റ് ഒന്നിന് 15 വീതം വര്‍ധിപ്പിച്ചു.
20 കിലോവാട്ടിനു മുകളില്‍ ഫിക്‌സഡ് ചാര്‍ജ് 150 ആയിരുന്നത് 170 ആയി ഉയര്‍ത്തുകയും യൂനിറ്റിന് 25 പൈസ നിരക്കില്‍ വര്‍ധന വരുത്തുകയും ചെയ്തിട്ടുണ്ട്. ചെറുകിട വ്യവസായ മേഖലക്ക് കനത്ത തിരിച്ചടിയാകുന്നതാണ് ഈ തീരുമാനം. ആരാധനാലയങ്ങള്‍, വൃദ്ധസദനങ്ങള്‍, അങ്കണവാടികള്‍ എന്നിവയ്ക്ക് നിലവില്‍ പ്രതിമാസ ഫിക്‌സഡ് ചാര്‍ജ് ഉണ്ടായിരുന്നില്ല. ഇപ്പോള്‍ 35 രൂപ ചുമത്തിയിട്ടുണ്ട്.