ന്യൂഡല്‍ഹി: ആഗ്രയില്‍ യമുന എക്‌സ്പ്രസ് ഹൈവേയില്‍ നിന്ന് ബസ് 50 അടി താഴ്ചയിലേക്ക് മറിഞ്ഞ് 29 പേര്‍ മരിച്ചു. 17 പേര്‍ക്ക് പരുക്കേറ്റു. നോയിഡയേയും ആഗ്രയേയും ബന്ധിപ്പിച്ചുകൊണ്ട് 165 കി.മീറ്റര്‍ ദൂരമുള്ള എക്‌സ്പ്രസ് വേയിലാണ് അപകടമുണ്ടായത്. ഉത്തര്‍പ്രദേശിലെ ലഖ്‌നൗവില്‍ നിന്ന് ഡല്‍ഹിയിലേക്ക് വരികയായിരുന്ന ഡല്‍ഹി ട്രാന്‍സ്‌പോര്‍ട്ട് കോര്‍പ്പറേഷന്‍ ബസ് ആണ് ഇന്നലെ രാവിലെ അപകടത്തില്‍പ്പെട്ടത്. 46 യാത്രക്കാരാണ് ബസില്‍ ഉണ്ടായിരുന്നത്.
അമിത വേഗതയിലായിരുന്നു ബസ്. ഡ്രൈവര്‍ ഉറങ്ങിപ്പോയതാണ് അപകടത്തിന് കാരണമെന്ന് ആഗ്ര ജില്ലാ മജിസ്‌ട്രേറ്റ് രവികുമാര്‍ മാധ്യമങ്ങളോട് പറഞ്ഞു. എക്‌സ്പ്രസ് വേയുടെ സുരക്ഷാവേലി തകര്‍ത്ത് വലിയ അഴുക്കുചാലിലേക്കാണ് ബസ് വീണത്. മരിച്ചവരുടെ കുടുംബങ്ങള്‍ക്ക് അഞ്ചു ലക്ഷം രൂപ വീതം സര്‍ക്കാര്‍ പ്രഖ്യാപിച്ചു.