ന്യൂഡല്‍ഹി: കാര്‍ഷിക നിയമങ്ങള്‍ പിന്‍വലിക്കുകയെന്ന ആവശ്യത്തില്‍നിന്നു കര്‍ഷക സംഘടനകള്‍ പിന്നോക്കം പോകാതിരുന്നതോടെ കേന്ദ്രസര്‍ക്കാര്‍ നടത്തിയ രണ്ടാം ചര്‍ച്ചയും പരാജയപ്പെട്ടു. ഇതോടെ ശക്തമായി സമരം തുടരാന്‍ കര്‍ഷക സംഘടനകള്‍ തീരുമാനിച്ചു.
കര്‍ഷകരുമായി നാളെ വീണ്ടും ചര്‍ച്ച നടത്തുമെന്നു കേന്ദ്രസര്‍ക്കാര്‍ വ്യക്തമാക്കി. ഈ ചര്‍ച്ചയില്‍ കര്‍ഷകര്‍ പങ്കെടുക്കുമോയെന്നു വ്യക്തമായിട്ടില്ല.
ഇനിയൊരു ചര്‍ച്ചകൂടി വേണ്ടതില്ലെന്ന നിലപാട് ചര്‍ച്ചയില്‍ പങ്കെടുത്ത പല സംഘടനാ പ്രതിനിധികളും സ്വീകരിച്ചിട്ടുണ്ട്. ഇന്നലെ, നിയമത്തില്‍ താങ്ങുവില ഉറപ്പാക്കുന്നതിനുള്ള ഭേദഗതി കൊണ്ടുവരാമെന്നു സര്‍ക്കാര്‍ ഉറപ്പുനല്‍കിയെങ്കിലും ഈ വാഗ്ദാനം കര്‍ഷകര്‍ തള്ളി.
നിയമം പൂര്‍ണമായും പിന്‍വലിക്കാന്‍ പാര്‍ലമെന്റ് സമ്മേളനം വിളിക്കണമെന്ന ആവശ്യമാണ് കര്‍ഷകര്‍ ഉന്നയിച്ചത്. തങ്ങളുടെ ആവശ്യങ്ങള്‍ കര്‍ഷകര്‍ സര്‍ക്കാരിന് എഴുതി നല്‍കുകയും ചെയ്തു.
നിയമത്തില്‍ തങ്ങള്‍ ചൂണ്ടിക്കാട്ടിയ പ്രശ്‌നങ്ങള്‍ ശരിയാണെന്നു സര്‍ക്കാര്‍ ചര്‍ച്ചയില്‍ സമ്മതിച്ചതായി കര്‍ഷക നേതാവ് ബല്‍വീന്ദര്‍ സിങ് പറഞ്ഞു. അതെല്ലാം തിരുത്താമെന്നാണ് അവര്‍ പറയുന്നത്. തിരുത്തുകയല്ല, നിയമം പിന്‍വലിക്കണമെന്നാണ് തങ്ങള്‍ ആവശ്യപ്പെട്ടതെന്നും അദ്ദേഹം പറഞ്ഞു.
സമരം പിന്‍വലിക്കണമെന്നും ബാക്കി കാര്യങ്ങള്‍ തുടര്‍ന്നും ചര്‍ച്ച ചെയ്യാമെന്നും മന്ത്രിമാരായ നരേന്ദ്രസിങ് തോമര്‍, പിയൂഷ് ഗോയല്‍ എന്നിവര്‍ പറഞ്ഞെങ്കിലും കര്‍ഷകര്‍ അംഗീകരിച്ചില്ല. ചര്‍ച്ചയില്‍ നേരിയ പുരോഗതി മാത്രമാണുണ്ടായതെന്ന് അസാദ് കിസാന്‍ സംഘര്‍ഷ് കമ്മിറ്റി പ്രതിനിധി ഹര്‍ജീന്ദര്‍ സിങ് പറഞ്ഞു.സമരക്കാര്‍ മുന്നോട്ടുവച്ച ആവശ്യങ്ങള്‍ മറ്റു മന്ത്രിമാരുമായി ചര്‍ച്ച ചെയ്യുമെന്നും ചര്‍ച്ച ഫലം കാണുമെന്നാണ് കരുതുന്നതെന്നും മന്ത്രി നരേന്ദ്രസിങ് തോമര്‍ മാധ്യമങ്ങളോട് പറഞ്ഞു.
കാര്‍ഷികോല്‍പന്ന വിപണന കേന്ദ്രങ്ങള്‍ ശക്തിപ്പെടുത്തുന്നതിനു നടപടി സ്വീകരിക്കും. സ്വകാര്യ മേഖലയ്ക്കും കാര്‍ഷികോല്‍പന്ന വിപണന കേന്ദ്രങ്ങള്‍ക്കും തുല്യനികുതി ഏര്‍പ്പെടുത്താനുള്ള നടപടി സ്വീകരിക്കുന്നത് സംബന്ധിച്ചും ആലോചിക്കുമെന്നും അദ്ദേഹം പറഞ്ഞു.
ഇന്നലെ ഏഴു മണിക്കൂറോളമാണ് കര്‍ഷകരുമായി സര്‍ക്കാര്‍ ചര്‍ച്ച നടത്തിയത്. അടുത്ത ചര്‍ച്ച നടക്കുന്ന നാളെ രാജ്യവ്യാപകമായി കര്‍ഷകര്‍ പ്രതിഷേധം സംഘടിപ്പിക്കാന്‍ തീരുമാനിച്ചിട്ടുണ്ട്.