റോം:  ഒരിക്കല്‍ ചമ്മിയിട്ട് മതിയായില്ല യു.എസ് പ്രസിഡന്റ് ഡൊണാള്‍ഡ് ട്രംപിന്. സഹധര്‍മിണിക്കു നേരെ കൈകള്‍ നീട്ടി, നിരസിക്കപ്പെട്ട് മാധ്യമങ്ങള്‍ക്കു മുന്നില്‍ വീണ്ടും അപഹാസ്യനായിരിക്കുകയാണ് ട്രംപ്. സംഭവത്തിന്റെ ദൃശ്യങ്ങള്‍ പതിവു പോലെ സോഷ്യല്‍ മീഡിയ ഏറ്റെടുക്കുകയും ചെയ്തിരിക്കുന്നു.

റോമില്‍ വിമാനമിറങ്ങവെയാണ് ഇത്തവണത്തെ നാടകം.ഓരോ രംഗവും വള്ളിപുള്ളി വിടാതെ ഒപ്പിയെടുക്കുകയും ചെയ്തിരിക്കുന്നു മാധ്യമങ്ങള്‍. വിമാനമിറങ്ങവെ ട്രംപ് കൈ നീട്ടിയത് ശ്രദ്ധിക്കാത്ത ഭാവത്തില്‍ മെലാനിയ കാറ്റില്‍ പാറുന്ന മുടിയൊതുക്കുന്നതാണ് ദൃശ്യത്തില്‍. ഇത്തവണത്തെ ദൃശ്യത്തില്‍ ട്രംപ് ജാള്യം മറക്കാന്‍ ശ്രമിക്കുന്നതും കാണാം.

കഴിഞ്ഞ ദിവസം ഇസ്രാഈല്‍ നല്‍കിയ സ്വീകരണത്തിനിടെ മെലാനിയ ട്രംപിന്റെ കൈകള്‍ തട്ടി മാറ്റിയത് വാര്‍ത്തയായിരുന്നു.  ബെന്‍ ഗുറിയോണ്‍ വിമാനത്താവളത്തിലെ റെഡ് കാര്‍പ്പറ്റില്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനും ഭാര്യ സാറയ്ക്കുമൊപ്പം നടക്കവേയാണ് ട്രംപിന്റെ കൈ ഭാര്യ തട്ടിമാറ്റിയത്. ബെഞ്ചമിന്‍ നെതന്യാഹുവിനും ഭാര്യക്കുമൊപ്പം നടന്ന ട്രംപിന് പിന്നാലെയാണ് മെലാനിയ നടന്നു വന്നത്.
കാത്തുനിന്ന മാധ്യമങ്ങള്‍ക്ക് അടുത്തേക്ക് എത്തിയപ്പോള്‍ അദ്ദേഹം ഭാര്യയുടെ നേര്‍ക്ക് കൈ നീട്ടി. എന്നാല്‍ മെലാനിയ കൈ തട്ടിമാറ്റുകയായിരുന്നു.