ഏതന്‍സ്: ഗ്രീസിലെ പൊതുതെരഞ്ഞെടുപ്പില്‍ മധ്യ വലതുപക്ഷ പാര്‍ട്ടിയായ ന്യൂ ഡെമോക്രസിക്കു ജയം. കിറിയാക്കോസ് മിറ്റ്‌സോടാകിസ് പുതിയ പ്രധാനമന്ത്രിയായി സത്യപ്രതിജ്ഞചെയ്തു.
ന്യൂ ഡെമോക്രസിക്ക് 39.85 ശതമാനം വോട്ടുകള്‍ ലഭിച്ചു. 31.6 ശതമാനം വോട്ടു നേടിയ മുന്‍ പ്രധാനമന്ത്രി സിപ്രാസിന്റെ ഇടതുപക്ഷ സിരിസ പാര്‍ട്ടി രണ്ടാം സ്ഥാനത്തായി. 51കാരനായ കിറിയാക്കോസ് ഹാര്‍വാര്‍ഡില്‍നിന്നും വിദ്യാഭ്യാസം നേടിയ മുന്‍ ബാങ്കറാണ്. ഇത് എല്ലാവരുടെയും വിജയമാണെന്ന് കന്നിപ്രസംഗത്തില്‍ അദ്ദേഹം പറഞ്ഞു.
ന്യൂ ഡെമോക്രസിക്ക് ഗ്രീക്ക് പാര്‍ലമെന്റില്‍ 158 സീറ്റുകളുടെ ഭൂരിപക്ഷമാണ് ലഭിച്ചത്. മൊത്തം 300 സീറ്റുകളാണ് പാര്‍ലമെന്റില്‍ ഉള്ളത്. സെന്റര്‍ ലെഫ്റ്റ് മൂവ്‌മെന്റ് ഫോര്‍ ചേഞ്ച് 7.9 ശതമാനവും കമ്മ്യൂണിസ്റ്റ് പാര്‍ട്ടി 5.4 ശതമാനവും വോട്ടാണ് നേടിയത്.