കൊച്ചി: ഗോള്‍ കീപ്പിങ്ങില്‍ മികച്ച താരങ്ങളെ വളര്‍ത്തിയെടുക്കുന്നതിന്റെ ഭാഗമായി കേരള ബ്ലാസ്റ്റേഴ്‌സ് ഫുട്‌ബോള്‍ ക്ലബ് രാജ്യത്തെ ആദ്യത്തെ ഗോള്‍ കീപ്പിങ് അക്കാദമി കൊച്ചിയില്‍ ആരംഭിക്കുന്നു. മുന്‍ ഇംഗ്ലീഷ് താരം ജോണ്‍ ബുറിഡ്ജ് പ്രതിഭകളെ കണ്ടെത്തുകയും പരിശീലിപ്പിക്കുകയും ചെയ്യും. ഫുട്‌ബോള്‍ താരങ്ങളില്‍ ഗോള്‍ കീപ്പിങ് കഴിവ് വികസിപ്പിക്കുകയാണ് അക്കാദമിയുടെ ലക്ഷ്യം. അന്താരാഷ്ട്ര തലത്തില്‍ ഉള്ള മികവ് താരങ്ങളില്‍ രൂപപ്പെടുത്തും. തുടക്കത്തില്‍ സീനിയര്‍ ടീമിലും റിസര്‍വ് ടീമിലും പിന്നീട് യുവ താരങ്ങളിലും ആയിരിക്കും ശ്രദ്ധ കേന്ദ്രീകരിക്കുക. പരിശീലകന്‍ ബുറിഡ്ജ് ഇംഗ്ലീഷ്, സ്‌കോട്ടിഷ് ലീഗുകളിലായി 771 മത്സരങ്ങളില്‍ കളിച്ചിട്ടുണ്ട്. 29 വര്‍ഷത്തെ കരിയറില്‍ 31 ടീമുകളില്‍ അദ്ദേഹം പ്രവര്‍ത്തിച്ചിട്ടുണ്ട്.