വടക്കാഞ്ചേരി: മച്ചാട് ഫോറസ്റ്റ് റെയ്ഞ്ചിലെ വാഴാനി ഡിവിഷനില്‍ ഉള്‍പ്പെട്ട കുറാഞ്ചേരി വനമേഖലയില്‍ വനത്തിനുള്ളില്‍ ആയുധധാരികളായ യുവാക്കളെ കണ്ടുവെന്ന ജനങ്ങളുടെ പരാതി പൊലിസിനേയും,വനപാലകരേയും ഒരു പോലെ വട്ടം കറക്കി. രണ്ട് ദിവസം കാട് മുഴുവന്‍ അരിച്ച് പെറുക്കിയ ഉദ്യോഗസ്ഥര്‍ ചെറിയ സൂചന പോലും ലഭിക്കാതെ ക്ഷീണിതരും നിരാശരുമായി കാടിറങ്ങി. കഴിഞ്ഞ എതാനും ദിവസങ്ങളായി വനത്തിനുള്ളില്‍ നിന്ന് യുവാക്കളുടെ ശബ്ദവും രാത്രിയില്‍ ബഹളവും കേള്‍ക്കാറുണ്ടായിരുന്നുവെന്ന് നാട്ടുകാരാണ് വടക്കാഞ്ചേരി പൊലിസിനേയും, വനപാലകരേയും വിവരമറിയിച്ചത്. തുടര്‍ന്ന് ഇരു വിഭാഗം ഉദ്യോഗസ്ഥരും സ്ഥലത്തെത്തി നാട്ടുകാരുടെ സഹായത്തോടെ തിരച്ചില്‍ ആരംഭിച്ചു. ഇന്നലെ കാലത്ത് മുതല്‍ രണ്ട് കിലോമീറ്റര്‍ ഉള്‍വനത്തിലേക്ക്് മാറിയും തിരച്ചില്‍ നടന്നു. എന്നാല്‍ വനത്തില്‍ ആരുമില്ലെന്ന നിഗമനത്തിലാണ് ഉദ്യോഗസ്ഥര്‍. കാടിനുള്ളില്‍ ജനവാസമുള്ളതിന്റെ ഒരു സൂചനയുമില്ലെന്ന് മേഖല ഡിവിഷന്‍ ഫോറസ്റ്റ് ഓഫിസര്‍ ശോഭന്‍ ബാബു സുപ്രഭാതത്തോട് പറഞ്ഞു. എങ്കിലും ജാഗ്രത തുടരുമെന്നും അദ്ദേഹം അറിയിച്ചു.