റിയോ ഡി ജനീറോ: കോപ അമേരിക്ക ചാംപ്യന്‍ഷിപ്പില്‍ ബ്രസീലിന് കിരീടം. കഴിഞ്ഞ ദിവസം നടന്ന ഫൈനലില്‍ പെറുവിനെ 3-1 എന്ന സ്‌കോറിന് പരാജയപ്പെടുത്തിയാണ് ബ്രസീല്‍ കിരീടം സ്വന്തമാക്കിയത്. ആവേശകരമായ മത്സരത്തില്‍ ചുവപ്പ് കാര്‍ഡിനെയും പെറുവിന്റെ പോരാട്ട വീര്യത്തേയും മറികടന്നായിരുന്നു ബ്രസീല്‍ കിരീടം നേടിയത്. ഗ്രൂപ്പ്ഘട്ട മത്സരത്തില്‍ എതിരില്ലാത്ത അഞ്ചു ഗോളുകള്‍ക്ക് പരാജയപ്പെട്ട പെറുവിനെ ആയിരുന്നില്ല ഫൈനലില്‍ കാണാനായത്. അച്ചടക്കത്തോടെ പ്രതിരോധം തീര്‍ത്ത പെറു ബ്രസീലിനെ പലപ്പോഴും വിറപ്പിച്ചു. പെറുവിന്റെ ശക്തമായ പ്രതിരോധം ഭേദിച്ച് 15ാം മിനുട്ടില്‍ ബ്രസീല്‍ ഒരു ഗോളിന് മുന്നിലെത്തി. എവര്‍ട്ടണിന്റെ വകയായിരുന്നു ആദ്യ ഗോള്‍. 44-ാം മിനുട്ടില്‍ ലഭിച്ച പെനാല്‍ട്ടിയിലൂടെ പെറു ബ്രസീലിന് ഒപ്പമെത്തി. ഗോറെറോ ആയിരുന്നു പെറുവിന് വേണ്ടി സമനില ഗോള്‍ നേടിയത്. പക്ഷെ ആ സമനിലക്ക് ഒരു മിനുട്ടിന്റെ ആയുസ് മാത്രമേ ഉണ്ട@ായുള്ളൂ. 45ാം മിനുട്ടില്‍ ജീസസിലൂടെ ബ്രസീല്‍ ലീഡ് വീണ്ടും ഉയര്‍ത്തി. 70-ാം മിനുട്ടില്‍ ജീസസ് രണ്ടാം മഞ്ഞക്കാര്‍ഡും വാങ്ങി കളം വിട്ടത് കാനറികള്‍ക്ക് തിരിച്ചടിയായി. ഇതോടെ 10 പേരായി ചുരുങ്ങിയ ബ്രസീല്‍ പ്രതിരോധത്തിലായി. പക്ഷെ കളിയുടെ അവസാന നിമിഷം കിട്ടിയ പെനാല്‍ട്ടി ബ്രസീലിനെ രക്ഷിച്ചു. 90ാം മിനുട്ടില്‍ റിച്ചാര്‍ലിസണാണ് ബ്രസീലിനായി പെനാല്‍ട്ടി വലയില്‍ എത്തിച്ചത്. പത്ത് പേരുമായി ചുരുങ്ങിയ ബ്രസീലിനെ പലവട്ടം പെറു വിറപ്പിച്ചെങ്കിലും ബ്രസീലിന്റെ പ്രതിരോധത്തില്‍ തട്ടി എല്ലാ ഗോള്‍ ശ്രമങ്ങളും പാഴായി. ഫൈനല്‍ വിസില്‍ മുഴങ്ങിയതോടെ ബ്രസീല്‍ ഒന്‍പതാം കോപ കിരീടം നേടിയ സന്തോഷത്തില്‍ ആഹ്ലാദത്തിമിര്‍പ്പിലായി.