കൊല്ലം: എക്‌സൈസ് വകുപ്പിന്റെ നേതൃത്വത്തിലുള്ള 'വിമുക്തി' ലഹരിവര്‍ജന മിഷന്റെ ആഭിമുഖ്യത്തില്‍ സംസ്ഥാനത്ത് എല്ലാ ജില്ലകളിലും ലഹരിവിമോചന ചികിത്സാ കേന്ദ്രങ്ങള്‍ പ്രവര്‍ത്തനമാരംഭിക്കും. ജില്ലയില്‍ ഒരു കേന്ദ്രം എന്ന രീതിയില്‍ അടുത്ത മാസമാണ് ഇവ പ്രവര്‍ത്തനമാരംഭിക്കുക.
ലഹരിക്ക് അടിമയായി കൗണ്‍സിലിങ്, ചികിത്സ എന്നിവ ആവശ്യമുള്ളവര്‍ക്കാണ് ചികിത്സ ലഭ്യമാക്കുക. എറണാകുളത്തും കോഴിക്കോട്ടും ലഹരിവിമോചന ചികിത്സാ കേന്ദ്രങ്ങള്‍ക്കൊപ്പം പ്രത്യേകം കൗണ്‍സിലിങ് സെന്ററുകളും ആരംഭിക്കും.
മദ്യമൊഴികെയുള്ള ലഹരി ഉപയോഗിക്കുന്നവരുടെ എണ്ണം പതിന്‍മടങ്ങ് വര്‍ധിച്ച സാഹചര്യത്തിലാണ് പുതിയ പദ്ധതി.
ലഹരിവിമോചന കേന്ദ്രം ആരംഭിക്കുന്നതിന് അടിസ്ഥാന സൗകര്യ വികസനം, മരുന്നുകള്‍, ഉപകരണങ്ങള്‍ എന്നിവയ്ക്കായി ഓരോ ജില്ലയിലും 24 ലക്ഷം രൂപയോളം ചെലവുവരും. ജീവനക്കാരുടെ ഓണറേറിയം നല്‍കാന്‍ പ്രതിവര്‍ഷം നാല്‍പതു ലക്ഷത്തോളം രൂപയാണ് കണക്കാക്കിയിരിക്കുന്നത്.
കണ്‍സള്‍ട്ടന്റ് സൈക്യാട്രിസ്റ്റ്, ഒരു എം.ബി.ബി.എസ് ഡോക്ടര്‍, മൂന്നു സ്റ്റാഫ് നഴ്‌സ്, ഒരു ക്ലിനിക്കല്‍ സൈക്കോളജിസ്റ്റ്, ഒരു സൈക്യാട്രിക് സോഷ്യല്‍ വര്‍ക്കര്‍, ഒരു ക്ലീനിങ് സ്റ്റാഫ്, മൂന്നു സുരക്ഷാ ജീവനക്കാര്‍ എന്നിങ്ങനെയാണ് സ്റ്റാഫ് പാറ്റേണ്‍.