തിരുവനന്തപുരം: കേന്ദ്ര-സംസ്ഥാന സര്‍ക്കാരുകള്‍ സംയുക്തമായി നടത്തുന്ന ഇന്‍ഷുറന്‍സ് പദ്ധതി വന്നതിനെ തുടര്‍ന്ന് മരവിപ്പിച്ച കാരുണ്യ പദ്ധതിയുടെ രജിസ്‌ട്രേഷന്‍ നീട്ടി സംസ്ഥാന സര്‍ക്കാര്‍ ഉത്തരവിറക്കി. നിലവില്‍ കാരുണ്യ ബനവലന്റ് സ്‌കീമില്‍ ചികിത്സയ്ക്ക് അര്‍ഹതയുള്ള ആരുടേയും സൗജന്യ ചികിത്സ മുടങ്ങില്ലെന്നും ഇതു സംബന്ധിച്ച ഉത്തരവ് പുറപ്പെടുവിച്ചതായും ആരോഗ്യമന്ത്രി കെ.കെ ശൈലജ പറഞ്ഞു.
കാരുണ്യ പദ്ധതിയുടെ സമയപരിധി അടുത്ത വര്‍ഷം മാര്‍ച്ച് 31 വരെയാണ് നീട്ടിയിരിക്കുന്നത്. കേന്ദ്രസര്‍ക്കാര്‍ നടപ്പാക്കുന്ന സമഗ്ര ഇന്‍ഷ്വറന്‍സ് പദ്ധതിയായ പ്രധാനമന്ത്രി ആയുഷ് മാന്‍ ഭാരത് ഇന്‍ഷ്വറന്‍സ് പദ്ധതിയും കേരള സര്‍ക്കാരിന്റെ ആരോഗ്യപദ്ധതിയും ചേര്‍ത്ത്''ആയുഷ്മാന്‍ ഭാരത് കാരുണ്യ ആരോഗ്യസുരക്ഷാ''ഇന്‍ഷ്വറന്‍സ് പദ്ധതി കഴിഞ്ഞ ഏപ്രില്‍ മുതല്‍ സര്‍ക്കാര്‍ നടപ്പാക്കിയതിനെ തുടര്‍ന്ന് കാരുണ്യ ചികിത്സാ സഹായ പദ്ധതി കഴിഞ്ഞ മാസം 30ന് അവസാനിപ്പിച്ചിരുന്നു.

തുടര്‍ന്ന് ഇതില്‍ രജിസ്റ്റര്‍ ചെയ്തവര്‍ക്ക് ആശുപത്രികള്‍ ചികിത്സ നിഷേധിച്ചതോടെ നിര്‍ധനരായ രോഗികള്‍ ദുരിതത്തിലാകുകയായിരുന്നു. ഇതോടെ പ്രതിഷേധവും ശക്തമായി. തുടര്‍ന്നാണ് കാരുണ്യ അവസാനിപ്പിച്ച നടപടി പിന്‍വലിച്ച് സംസ്ഥാന സര്‍ക്കാര്‍ തലയൂരിയത്. കാരുണ്യ ലോട്ടറിയില്‍ നിന്നുള്ള വരുമാനം ഉപയോഗിച്ച് നടപ്പാക്കുന്ന പദ്ധതി തുടരാന്‍ ധനവകുപ്പുമായി ധാരണയായെന്നും കാരുണ്യപദ്ധതി അടുത്ത വര്‍ഷം മാര്‍ച്ച് 31വരെ തുടരുമെന്നുമായിരുന്നു ഇന്നലെ ആരോഗ്യമന്ത്രിയുടെ ഓഫീസ് അറിയിച്ചത്.

ഇതുസംബന്ധിച്ച ഉത്തരവ് നാളെ പുറത്തിറങ്ങുമെന്നും ഉത്തരവിറങ്ങും വരെ ചികിത്സതേടി എത്തുന്നവരെ തിരിച്ചയക്കരുതെന്നും ആശുപത്രികള്‍ കണക്കുകള്‍ സൂക്ഷിക്കണമെന്നും പണം സര്‍ക്കാര്‍ നല്‍കുമെന്നും മന്ത്രി ആശുപത്രികളെ അറിയിച്ചിരുന്നു. ആ ഉത്തരവാണ് ഇന്ന് പുറത്തിറങ്ങിയത്.
കിടത്തി ചികിത്സയിലുള്ള രോഗികള്‍ക്ക് അഞ്ച് ലക്ഷം രൂപവരെ ചികിത്സാസഹായം കിട്ടുന്ന ഇന്‍ഷ്വറന്‍സ് പദ്ധതിയാണ് ആയുഷ്മാന്‍ ഭാരത് കാരുണ്യ ആരോഗ്യസുരക്ഷാ പദ്ധതി. റിലയന്‍സിനാണ് നടത്തിപ്പ് ചുമതല. പുതിയ ചികിത്സാ പദ്ധതി വന്നതോടെ കാരുണ്യാചികിത്സ സഹായ പദ്ധതിയുടെ രജിസ്ട്രേഷന്‍ ജൂണ്‍ മുപ്പതിന് സര്‍ക്കാര്‍ അവസാനിപ്പിച്ചിരിക്കുകയാണ്. ആശുപത്രിയില്‍ അഡ്മിറ്റ് ആവാതെ ഡയാലിസിസും കീമോതെറാപ്പിയും ചെയ്യുന്നവര്‍ക്ക് പുതിയ പദ്ധതിയുടെ ആനുകൂല്യം ലഭിക്കില്ല.

കാരുണ്യ വഴി ഇത് ലഭിച്ചിരുന്നു. തുടര്‍ന്ന് ഏതാണ്ട് ഇരുപതു ലക്ഷത്തിലേറെ നിര്‍ധനരോഗികളുടെ ചികിത്സ മുടങ്ങുന്ന അവസ്ഥ ഉണ്ടായി. ആര്‍.സി.സിയും ശ്രീചിത്രയും അടക്കമുള്ള ആശുപത്രികള്‍ വരെ രോഗികള്‍ക്ക് ചികിത്സ നിഷേധിച്ചു. ആഴ്ചയില്‍ മൂന്നും നാലും തവണ ഡയാലിസസ് ചെയ്യുന്ന രോഗികളും ക്യാന്‍സര്‍ ചികിത്സയുടെ ഭാഗമായി കീമോതെറാപ്പിയും റേഡിയേഷനും ചെയ്യുന്ന രോഗികളും അവയവ മാറ്റമടക്കമുള്ള ശസ്ത്രക്രിയകളുടെ ഭാഗമായി വില കൂടിയ മരുന്നുകള്‍ കഴിക്കുന്ന രോഗികളും പദ്ധതിയില്‍നിന്നും പുറത്തായിരുന്നു. ഇത് വലിയ പ്രതിഷേധം സൃഷ്ടിച്ചു. ഇതോടെയാണ് സര്‍ക്കാര്‍ നിലപാട് മാറ്റാന്‍ നിര്‍ബന്ധിതരായത്.