നെയ്യാറ്റിന്‍കര: മാരായമുട്ടം കെ.എസ്.ഇ.ബി ഓഫിസില്‍ യാത്ര അയപ്പ് ചടങ്ങിനെ തുടര്‍ന്ന് ജീവനക്കാര്‍ക്കിടയില്‍ ഇരുവിഭാഗങ്ങള്‍ തമ്മില്‍ ചേരി തിരിഞ്ഞുണ്ടായ സംഘര്‍ഷത്തില്‍ മാരായമുട്ടം ഓഫിസിലെ സബ് എന്‍ജിനിയര്‍ ഹരികുമാറിന് മര്‍ദനമേറ്റു.
 ഇന്നലെ ഉച്ചയ്ക്ക് 12.30 നായിരുന്നു സംഭവം. മാരായമുട്ടം ഓഫിസിലെ ജീവനക്കാരനായ അനിരുദ്ധന്റെ യാത്ര അയപ്പ് ചടങ്ങിന് നെയ്യാറ്റിന്‍കര ഡിവിഷനില്‍ നിന്നും എത്തിയ സീനിയര്‍ അസിസ്റ്റന്റുമാരായ അജിയും പ്രേംകുമാറുമാണ് ഹരികുമാറിനെ മര്‍ദിച്ചതായി പറയുന്നത്. ഇവര്‍ സി.ഐ.ടി.യു , ഐ.എന്‍.ടി.യു.സി വിഭാഗങ്ങളില്‍ പെട്ടവരാണ്. മര്‍ദനമേറ്റ ഹരികുമാര്‍ ഐ.എന്‍.ടി.യു.സി യൂനിയനില്‍ ഉള്‍പ്പെട്ട ആളാണ്. ജിവനക്കാര്‍ മദ്യപിച്ചിരുന്നതായി നാട്ടുകാര്‍ പറയുന്നു. ഫണ്ട് ശേഖരണവുമായി ബന്ധപ്പെട്ടാണ് ഇരു വിഭാഗത്തിലെയും ജീവനക്കാര്‍ ഏറ്റു മുട്ടിയത്.
മര്‍ദനമേറ്റ ഹരികുമാര്‍ നെയ്യാറ്റിന്‍കര ജനറല്‍ ആശുപത്രിയില്‍ ചികിത്സ തേടിയിരിക്കുകയാണ്. ഹരികുമാര്‍ നല്‍കിയ പരാതിയുടെ അടിസ്ഥാനത്തില്‍ മാരയമുട്ടം പൊലീസ് കേസെടുത്തു.