മാഡ്രിഡ്: ലാ ലിഗയില്‍ സെവിയ്യക്കെതിരേയുള്ള മത്സരത്തില്‍ റയല്‍ മാഡ്രിഡ് താരം മാഴ്‌സലോക്ക് പരുക്ക്. പരുക്കിനെ തുടര്‍ന്ന് താരത്തിന് മൂന്ന് കളികള്‍ നഷ്ടമായേക്കും. സെവിയ്യയോട് എതിരില്ലാത്ത 3 ഗോളുകള്‍ക്ക് തോറ്റ മത്സരത്തിലായിരുന്നു മാഴ്‌സലോക്ക് പരുക്കേറ്റത്. മാഡ്രിഡിന്റെ ഒന്നാം നമ്പര്‍ ലെഫ്റ്റ് ബാക്കായ മാഴ്‌സലോ ഇല്ലാതെയാവും റയല്‍ അത്‌ലറ്റികോ മാഡ്രിഡ്, സി.എസ്.കെ.എ മോസ്‌കോ എന്നിവര്‍ക്കെതിരായ മത്സരത്തില്‍ കളിക്കുക. ഇത് ടീമിന് തിരിച്ചടിയാകും. അതേസമയം, ഇസ്‌കോക്ക് സീസണിലെ ആദ്യ എല്‍ക്ലാസിക്കോയും നഷ്ടമാകും. താരത്തിന് ഒരു മാസത്തിലേറെ വിശ്രമം ആവശ്യമാണെന്നാണ് റിപ്പോര്‍ട്ടുകള്‍. അപ്പെന്‍ഡിക്‌സിനുള്ള ചികിത്സക്ക് ശേഷമുള്ള വിശ്രമത്തിലാണ് താരം.
ഒക്ടോബര്‍ 28നാണ് ഈ സീസണിലെ ആദ്യ എല്‍ക്ലാസിക്കോ പോരാട്ടം. ബാഴ്‌സയുടെ മൈതാനമായ ക്യാംപ് നൗവില്‍ നടക്കുന്ന പോരാട്ടത്തില്‍ താരം കളിച്ചില്ലെങ്കില്‍ റയലിന് വലിയ തിരിച്ചടിയാകും.