കൊച്ചി: കേരള ബ്ലാസ്റ്റേഴ്‌സ് യുവതാരം അര്‍ജുന്‍ ജയരാജ് കേരള ബ്ലാസ്റ്റേഴ്‌സ് വിട്ടു. കരാര്‍ ഇനിയും രണ്ട് വര്‍ഷം ബാക്കി നില്‍ക്കെയാണ് താരവും ക്ലബും വഴി പിരിഞ്ഞത്.
കഴിഞ്ഞ സീസണില്‍ കേരള ബ്ലാസ്റ്റേഴ്‌സിലെത്തിയ താരം ക്ലബിനായി ഒരു മത്സരം പോലും കളിക്കാനാകാതെയാണ് ക്ലബ് വിടുന്നത്. കഴിഞ്ഞ സീസണില്‍ പരുക്ക് കാരണം ഐ.എസ്.എല്‍ ടീമിലെത്താന്‍ അര്‍ജുന്‍ ജയരാജിനായിരുന്നില്ല. ഈ സീസണില്‍ ടീമിലുള്‍പ്പെട്ടിരുന്നെങ്കിലും ഇതുവരെ ഒരു മത്സരത്തില്‍ പോലും താരം കളത്തിലിറങ്ങിയിട്ടില്ല. യുവതാരങ്ങള്‍ നിറഞ്ഞ കേരള ബ്ലാസ്റ്റേഴ്‌സില്‍ നിന്ന് അവസരം കിട്ടുമെന്ന പ്രതീക്ഷ അവസാനിച്ചതോടെയാണ് ക്ലബുമായി ചര്‍ച്ച ചെയ്ത് അര്‍ജുന്‍ കരാര്‍ റദ്ദാക്കിയത്. ഗോകുലം കേരള എഫ്.സിയില്‍ നടത്തിയ മികച്ച പ്രകടനമാണ് താരത്തെ ബ്ലാസ്റ്റേഴ്‌സിലെത്തിച്ചത്.