(ഒന്നാം പേജില്‍ നിന്ന് തുടര്‍ച്ച)
സ്വതന്ത്രനായ എം.ജയശങ്കര്‍ കൗണ്‍സിലര്‍ സ്ഥാനം രാജിവെച്ചതിനെ തുടര്‍ന്നാണ് ഉപതെരഞ്ഞെടുപ്പ് നടന്നത്. പാലമേല്‍ ഗ്രാമപഞ്ചായത്തില്‍ ആദിക്കാട്ടകുളങ്ങര വാര്‍ഡ് 10 യു. ഡി. എഫില്‍ നിന്ന് എല്‍. ഡി. എഫ് പിടിച്ചെടുത്തു. സി.പി.എം. സ്ഥാനാര്‍ഥി ഷൈലജ 137 വോട്ടുകള്‍ നേടി വിജയിച്ചു. കോണ്‍ഗ്രസിലെ ഷീജയാണ് പരാജയപ്പെട്ടത്.
കണ്ണൂര്‍ കല്യാശ്ശേരി പഞ്ചായത്തിലെ അഞ്ചാംപീടിക വാര്‍ഡില്‍ എല്‍.ഡി.എഫ് ഭൂരിപക്ഷം കൂട്ടി സീറ്റ് നിലനിര്‍ത്തി. സ്ഥാനാര്‍ഥി ഡി.രമ യു.ഡി.എഫിലെ ഒ.വി ലതയെ 505 വോട്ടിന് തോല്‍പിച്ചു.
കോഴിക്കോട് ഓമശ്ശേരി ഗ്രാമപഞ്ചായത്തിലെ ആറാം വാര്‍ഡില്‍ (ഓമശ്ശേരി ഈസ്റ്റ്) ഇടതുപക്ഷം സീറ്റ് നിലനിര്‍ത്തി. സര്‍ക്കാര്‍ സര്‍വീസില്‍ നിയമനം ലഭിച്ചതിനെത്തുടര്‍ന്ന് ഇടതംഗം ബിജു അരീക്കല്‍ രാജിവച്ച ഒഴിവിലായിരുന്നു തെരഞ്ഞെടുപ്പ്. 76 വോട്ടിന്റെ ഭൂരിപക്ഷത്തിനു എല്‍.ഡി.എഫിലെ കെ.കെ.ഭാസ്‌കരന്‍ ജയിച്ചു. എന്നാല്‍ കാന്തപുരം വിഭാഗവും വെല്‍ഫയര്‍ പാര്‍ട്ടിയും ഇടത് പക്ഷത്തോടൊപ്പം നിന്നിട്ടും പ്രതീക്ഷിച്ച ലീഡ് നേടാനാവാത്തത് ഇടതുമുന്നണിക്ക് തിരിച്ചടിയായി. മലപ്പുറത്ത് ഊരകം പഞ്ചായത്തിലെ 3-ാം വാര്‍ഡ് ഒ.കെ.എം നഗറില്‍ ഇടതുപക്ഷത്തെ സിറ്റിങ് സീറ്റില്‍ തോറ്റു. യു.ഡി.എഫാണ് വിജയിച്ചത്. മുസ്‌ലിം ലീഗ് സ്വതന്ത്ര റീന തിരുത്തിയാണ് സി.പി.എം സ്വതന്ത്ര രജിത സുനിലിനെ 114 വോട്ടുകള്‍ക്ക് പരാജയപ്പെടുത്തിയത്.
കൊടുങ്ങല്ലൂര്‍ ശ്രീനാരായണപുരം പഞ്ചായത്തിലെ 15-ാം വാര്‍ഡ് യു.ഡി.എഫ് പിടിച്ചെടുത്തു. കോണ്‍ഗ്രസ് സ്ഥാനാര്‍ത്ഥി കെ.എ ഹൈദ്രോസ് 98 വോട്ടിനാണ് സീറ്റ് പിടിച്ചെടുത്തത്. 15ാം വാര്‍ഡില്‍ എല്‍.ഡി.എഫിലെ എ.മുരളീധരന്‍ മരണമടഞ്ഞതിനെ തുടര്‍ന്നാണ് ഉപതെരഞ്ഞെടുപ്പ് നടന്നത്. അന്ന് ഒരു വോട്ടിനാണ് യു.ഡി.എഫ് സ്ഥാനാര്‍ഥിയായ കെ.എ ഹൈദ്രോസ് പരാജയപ്പെട്ടത്.
ഒറ്റപ്പാലം നഗരസഭയിലെ കണ്ണിയമ്പുറം വായനശാല വാര്‍ഡ് എല്‍.ഡി.എഫ് നിലനിര്‍ത്തി. സി.പി.എമ്മിലെ കെ.കെ രാമകൃഷ്ണന്‍ 385 വോട്ടുകള്‍ക്കാണ് വിജയിച്ചത്. തൃപ്പൂണിത്തുറ നഗരസഭയിലെ 39ാം ഡിവിഷന്‍ ബി. ജെ. പിയില്‍ നിന്ന് യു.ഡി.എഫ് പിടിച്ചെടുത്തു. യു.ഡി.എഫ് സ്ഥാനാര്‍ഥി ശബരിഗിരീശന്‍ 94 വോട്ടുകള്‍ക്കു വിജയിച്ചു. ബി.ജെ.പി സ്ഥാനാര്‍ഥി വേണുഗോപാല്‍ മരിച്ചതിനെ തുടര്‍ന്നായിരുന്നു ഉപതെരഞ്ഞെടുപ്പ്. കഴിഞ്ഞ തവണ യു.ഡി.എഫ് സ്ഥാനാര്‍ഥിയായിരുന്ന ശബരിഗിരീശന്‍ അഞ്ച് വോട്ടുകള്‍ക്കാണ് ബി.ജെ.പി സ്ഥാനാര്‍ഥിയോട് തോറ്റത്.
ഇടുക്കിയിലെ കൊക്കയാര്‍ ഗ്രാമപഞ്ചായത്തില്‍ എല്‍.ഡി.എഫ് അട്ടിമറി ജയം നേടിയതോടെ ഗ്രാമപഞ്ചായത്ത് ഭരണം യു.ഡി.എഫിന് നഷ്ടമായി. സി.പി.എം സ്വതന്ത്രന്‍ തോമസ് ലൂക്കോസ് 235 നാണ് വിജയിച്ചത്. യു.ഡി.എഫിലെ ജോസഫ് വടക്കേലിനെയാണ് ഇദ്ദേഹം പരാജയപ്പെടുത്തിയത്. കഴിഞ്ഞ തെരഞ്ഞെടുപ്പില്‍ കേരളാ കോണ്‍ഗ്രസിലെ (എം) ഷാജി ജോസഫ് 234 വോട്ടുകള്‍ക്കാണ് വിജയിച്ചത്. ഗ്രാമപഞ്ചായത്ത് അംഗത്വം രാജിവച്ച് ഇദ്ദേഹം ജനാധിപത്യ കേരള കോണ്‍ഗ്രസില്‍ ചേര്‍ന്നതോടെയാണ് ഉപതെരഞ്ഞെടുപ്പ്. തിരുവനന്തപുരം കോര്‍പ്പറേഷനിലെ പാപ്പനംകോട് വാര്‍ഡ് ബി.ജെ.പി നിലനിര്‍ത്തി. ബി.ജെ.പിയിലെ ആശാനാഥ്. ജി.എസ് സി.പി.എമ്മിലെ കെ. മോഹനനെ 35 വോട്ടുകള്‍ക്ക് തോല്‍പിച്ചു.
വെട്ടൂര്‍ ഗ്രാമപഞ്ചായത്തിലെ അക്കരവിള വാര്‍ഡ് യു.ഡി.എഫില്‍ നിന്ന് എല്‍.ഡി.എഫ് പിടിച്ചെടുത്തു. 134 വോട്ടിന്റെ ഭൂരിപക്ഷത്തില്‍ സി.പി.എമ്മിലെ വി.റീന യു.ഡി.എഫിലെ സജില റുക്കിയയെ പരാജയപ്പെടുത്തി. തൊളിക്കോട് ഗ്രാമപഞ്ചായത്തിലെ തോട്ടുമുക്ക് വാര്‍ഡ് യു.ഡി.എഫില്‍ നിന്ന് എല്‍.ഡി.എഫ് പിടിച്ചെടുത്തു. 151 വോട്ടിന്റെ ഭൂരിപക്ഷത്തില്‍ സി.പി.എമ്മിലെ സജിത എം.പി യു.ഡി.എഫിലെ എം.ഹലീമയെയാണ് പരാജയപ്പെടുത്തി.