കാട്ടാക്കട: സ്‌കൂളുകള്‍ കേന്ദ്രീകരിച്ച് ഓട്ടോറിക്ഷയില്‍ സഞ്ചരിച്ച് കഞ്ചാവ് വില്‍പ്പന നടത്തുന്ന സംഘത്തെ നെയ്യാര്‍ഡാം പൊലിസ് പിടികൂടി. ശാസ്തമംഗലം വില്ലേജില്‍ പൂജപ്പുര പി.ആര്‍.എ 165 -ബി കുന്നുവിള വീട്ടില്‍ കിച്ചു എന്നു വിളിക്കുന്ന വിപിന്‍ ( 30) , തിരുമല വിജയമോഹിനി സ്പിന്നിങ് മില്ലില്‍ ക്വാര്‍ട്ടേഴ്‌സില്‍ താമസിക്കുന്ന അനു എന്ന അനൂപ് ( 26), തിരുമല ചെറുകര മാടന്‍ ക്ഷേത്രത്തിന് സമീപം വിഷ്ണു( 28), വിളപ്പില്‍ കാരോട് പടവന്‍കോട് എം.എ.കെ മന്‍സിലില്‍ ഷെമീം ( 27) എന്നിവരെയാണ് പിടികൂടിയത്.
ഇന്നലെ രാവിലെ നെയ്യാര്‍ഡാം ഹയര്‍സെക്കന്‍ഡറി സ്‌കൂളിന് മുന്‍വശത്തായി സ്‌കൂള്‍ കൂട്ടികള്‍ക്ക് കഞ്ചാവ് വില്‍പ്പന നടത്തുന്നതിനിടെയാണ് അറസ്റ്റ് ചെയ്തത്. ഇവര്‍ സഞ്ചരിച്ച ഓട്ടോറിക്ഷയില്‍ നിന്നും വില്‍പ്പനയ്ക്കായി ചെറുപായ്ക്കറ്റില്‍ സൂക്ഷിച്ചിരുന്ന കഞ്ചാവും വില്‍പ്പനയില്‍ കിട്ടിയ 23,000 രൂപയും കണ്ടെടുത്തു. നെയ്യാര്‍ഡാം എസ്.ഐ എസ്. ശ്രീകുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. കാട്ടാക്കട കോടതി പ്രതികളെ റിമാന്റ് ചെയ്തു. ഈ സംഘത്തില്‍പ്പെട്ട മറ്റുള്ളവരെ കുറിച്ച് പൊലിസിന് വിവരം ലഭിച്ചിട്ടുണ്ട്.