കാഞ്ഞങ്ങാട്: ആരോഗ്യ സര്‍വകലാശാല യൂനിയന്‍ നോര്‍ത്ത് സോണ്‍ കലോത്സവം യുഫോറിയ 2016നു തുടക്കമായി. പെരിയ ആയമ്പാറ സി മെറ്റ് നഴ്‌സിങ് കോളജില്‍ ഇന്നലെ രാവിലെയാണ് മൂന്നു ദിവസങ്ങളിലായി നടക്കുന്ന കലോത്സവം ആരംഭിച്ചത്.
മലപ്പുറം, വയനാട്, കോഴിക്കോട്, കണ്ണൂര്‍, കാസര്‍കോട് ജില്ലകളിലെ 45 കോളജുകളില്‍നിന്നായി ആയിരത്തോളം കലാപ്രതിഭകളാണ് 71 ഇനങ്ങളിലായി മാറ്റുരയ്ക്കുക. രോഹിത് വെമുല, കല്‍ബുര്‍ഗി, നരേന്ദ്ര ദബോല്‍ക്കര്‍ എന്നിവരുടെ പേരുകള്‍ നാമകരണം ചെയ്ത അഞ്ചു വേദികളിലാണ് മത്സരങ്ങള്‍. സ്റ്റേജിതര മത്സരങ്ങളുടെ ഉദ്ഘാടനം നാടക നടി നിലമ്പൂര്‍ ആയിശ നിര്‍വഹിച്ചു. മുബീനാ ഗഫൂര്‍ അധ്യക്ഷയായി.
കലോത്സവത്തിന്റെ ഉദ്ഘാടനം ഇന്നു വൈകിട്ട് നാലിനു റവന്യൂ മന്ത്രി ഇ. ചന്ദ്രശേഖരന്‍ നിര്‍വഹിക്കും. കെ. കുഞ്ഞിരാമന്‍ എം.എല്‍.എ അധ്യക്ഷനാകും.