തിരുവനന്തപുരം: പുതുതലമുറയ്ക്ക് അനുകരണീയ മാതൃകകള്‍ അനിവാര്യമാണെന്നു പാണക്കാട് സയ്യിദ് അബ്ബാസലി ശിഹാബ് തങ്ങള്‍ പറഞ്ഞു. വളര്‍ച്ച പ്രാപിക്കുന്ന ഘട്ടത്തില്‍ത്തന്നെ കുട്ടികളിലെ വിചാര വികാരങ്ങള്‍ നല്ല സംസ്‌കൃതിയിലൂടെ വാര്‍ത്തെടുക്കല്‍ കാലഘട്ടത്തിന്റെ ആവശ്യമാണെന്നും അദ്ദേഹം പറഞ്ഞു.
സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡിനു കീഴില്‍ പ്രവര്‍ത്തിച്ചു വരുന്ന അല്‍ബിര്‍റ് പ്രീ സ്‌കൂളുകളിലെ പ്രവേശനോത്സവത്തിന്റെ സംസ്ഥാന തല ഉദ്ഘാടനം ചിറയിന്‍കീഴില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. ചിറയിന്‍കീഴ് ശംസുല്‍ ഉലമാ ഇസ്‌ലാമിക് അക്കാദമിയുടെ കീഴില്‍ ആരംഭിച്ച അല്‍ബിര്‍റ് പ്രീ സ്‌കൂളില്‍ പ്രവേശനം നേടിയ മുഴുവന്‍ വിദ്യാര്‍ഥികള്‍ക്കും തങ്ങള്‍ ഖുര്‍ ആന്‍ വാചകം ചൊല്ലിക്കൊടുത്തു.
സമ്മേളനത്തില്‍ സമസ്തകേരളാ ജംഇയ്യത്തുല്‍ ഉലമാ ജില്ലാ സെക്രട്ടറി എ.എം. നൗഷാദ് ബാഖവി അധ്യക്ഷനായി. വിഴിഞ്ഞം സഈദ് മൗലവി പ്രാര്‍ഥന നടത്തി. അല്‍ബിര്‍റ് ഡയറക്ടര്‍ ഡോ. എന്‍.എ.എം. അബ്ദുല്‍ഖാദര്‍ മുഖ്യപ്രഭാഷണവും ഹാരിസ് ഹുദവി മാടപ്പള്ളി വിഷയാവതരണവും നടത്തി. സമസ്ത ജില്ലാ പ്രസിഡന്റ് ഷാജഹാന്‍ ദാരിമി പനവൂര്‍, ഓര്‍ഗനൈസര്‍ ഒ.എം. ഷെരീഫ് ദാരിമി, നസീര്‍ഖാന്‍ ഫൈസി, ഹുസയ്ന്‍ ദാരിമി, തോന്നയ്ക്കല്‍ ജമാല്‍, ഇസ്മയില്‍ മുജദ്ദിദി, ഫൈസല്‍ ഹുദവി പരതക്കാട്, ഹസന്‍ കുറ്റിക്കാട്ടൂര്‍, നൗഫല്‍ പുല്ലാളൂര്‍, മൊയ്തു മാസ്റ്റര്‍ വാണിമേല്‍, ഡോ.എന്‍.ഷംനാദ്, ഹസന്‍ ആലംകോട്, എന്‍. വിശ്വനാഥന്‍ നായര്‍ എന്നിവര്‍ സംസാരിച്ചു.