ചെറുവത്തൂര്‍: പൊതുവിദ്യാലയങ്ങളില്‍ പ്രവേശനത്തിന് രക്ഷിതാക്കളില്‍ നിന്ന് അധികമായി വാങ്ങിയ തുക ഒരാഴ്ചയ്ക്കകം തിരികെ നല്‍കണം. പ്രവേശനത്തിനു പി.ടി.എ. ഫണ്ടായി നൂറു രൂപ മാത്രം പിരിച്ചെടുക്കാനാണ് വിദ്യാഭ്യാസ വകുപ്പ് അനുവദിക്കുന്നത്. എന്നാല്‍ പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി വിദ്യാലയ വികസന നിധിയെന്ന പേരില്‍ രക്ഷിതാക്കളില്‍നിന്ന് വന്‍തുക പിരിച്ചെടുക്കുന്നതായി സംസ്ഥാന വ്യാപകമായി പരാതിയുയര്‍ന്നിരുന്നു. ഇതേ തുടര്‍ന്നാണ് അധികമായി വാങ്ങിയ തുക ഉടന്‍ തിരിച്ചു നല്‍കാനും പണം വാങ്ങിയ പ്രധാനാധ്യാപകരോട് വിശദീകരണം തേടാനും പൊതുവിദ്യാഭ്യാസ ഡയറക്ടര്‍ നിര്‍ദേശം നല്‍കിയിരിക്കുന്നത്.
വിദ്യാലയങ്ങളില്‍ ഒന്ന്, അഞ്ച്, എട്ട് ക്ലാസുകളിലേക്കാണ് കൂടുതല്‍ കുട്ടികള്‍ പുതുതായി പ്രവേശനം നേടുന്നത്. ഒന്നാംതരത്തിലേക്കുള്ള പ്രവേശനസമയത്ത് പോലും അയ്യായിരം രൂപ വരെ വാങ്ങുന്നതായി ചില രക്ഷിതാക്കള്‍ രേഖാമൂലം പരാതിനല്‍കിയിരുന്നു. കുട്ടികളുടെ കൈയില്‍ നിന്ന് പണം പിരിക്കുന്നത് മാത്രമാണ് വിലക്കിയിരിക്കുന്നതെന്നും രക്ഷിതാക്കളില്‍ നിന്ന് പണം പിരിക്കുന്നതില്‍ തെറ്റില്ലെന്നുമുള്ള വിചിത്രവാദവും ചിലയിടങ്ങളില്‍ ബന്ധപ്പെട്ടവര്‍ ഉന്നയിക്കുന്നുണ്ട്. അതിനിടെ സ്‌കൂള്‍ വികസനത്തിന് സ്വമേധയാ നല്‍കുന്ന സംഭാവനകള്‍ രസീത് നല്‍കി സ്വീകരിക്കുന്നത് വിലക്കുന്ന തരത്തിലേക്ക് കാര്യങ്ങള്‍ മാറിയാല്‍ വിദ്യാലയ വികസനപ്രവര്‍ത്തനങ്ങളെ അത് സാരമായി ബാധിക്കുമെന്ന് സ്‌കൂള്‍ വികസനസമിതി ഭാരവാഹികള്‍ പറയുന്നു. പൊതുവിദ്യാലയങ്ങള്‍ ജനകീയ കൂട്ടായ്മയില്‍ ഉയര്‍ന്നുവരുന്നത് തടയാനുള്ള ശ്രമങ്ങളുടെ ഭാഗമാണ് 'അനധികൃത പണപ്പിരിവ് ' എന്ന വാദത്തിന് പിന്നിലെന്ന് ഇത്തരം ആരോപണങ്ങള്‍ നേരിടേണ്ടി വന്ന കണ്ണൂര്‍, കാസര്‍കോട് ജില്ലകളിലെ വിദ്യാലയ അധികൃതര്‍ പറയുന്നത്.
കഴിഞ്ഞ വര്‍ഷം പ്ലസ് വണ്‍ പ്രവേശനത്തിന് പണം വാങ്ങുന്നതായി പരാതി ഉയര്‍ന്നപ്പോള്‍ ഹയര്‍സെക്കന്‍ഡറി ഡയറക്ടറേറ്റ് ഇടപെട്ട് പണപ്പിരിവ് വിലക്കിയിരുന്നു.