കണ്ണൂര്‍: തദ്ദേശ തെരഞ്ഞെടുപ്പില്‍ കോണ്‍ഗ്രസ് സംസ്ഥാന വ്യാപകമായി അടിച്ച പോസ്റ്ററുകളില്‍ തന്റെ പടമില്ലെങ്കിലെന്തെന്ന് എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടി. കെ.പി.സി.സി അച്ചടിച്ച പോസ്റ്ററുകളില്‍ താങ്കളുടെ പടമില്ലല്ലോയെന്ന മാധ്യമപ്രവര്‍ത്തകരുടെ ചോദ്യത്തിനാണ് ഉമ്മന്‍ചാണ്ടി ഇങ്ങനെ മറുപടി പറഞ്ഞത്. 

കണ്ണൂര്‍ പ്രസ് ക്ലബില്‍ മീറ്റ് ദ പ്രസില്‍ സംസാരിക്കുകയായിരുന്നു അദ്ദേഹം. 

താനിപ്പോള്‍ സംസ്ഥാനത്ത് ടോപ്പ് പോസ്റ്റിലൊന്നുമല്ലല്ലോ, പ്രതിപക്ഷ നേതാവും കെ.പി.സി.സി പ്രസിഡന്റുമൊക്കെയാണ് കോണ്‍ഗ്രസിന്റെ കേരളത്തിലെ മുതിര്‍ന്ന സ്ഥാനത്ത്. അതങ്ങനെ വലിയ വിഷയമൊന്നുമാക്കേണ്ടതില്ല. ഇടതുമുന്നണി തെരഞ്ഞെടുപ്പ് ചിത്രങ്ങളില്‍ മുഖ്യമന്ത്രി പിണറായി വിജയന്റെ ചിത്രമില്ലാത്തതും വിവാദമായിട്ടുണ്ടല്ലോയെന്ന ചോദ്യത്തിനു അതൊക്കെ അവരുടെ പാര്‍ട്ടിക്കാര്യമാണെന്നും ഉമ്മന്‍ചാണ്ടി പ്രതികരിച്ചു.