തൃശൂര്‍: പൊതു പുനര്‍നിര്‍മിതി പ്രവര്‍ത്തനങ്ങള്‍ക്കൊപ്പം വിദ്യാഭ്യാസ പുനര്‍നിര്‍മാണ പ്രവര്‍ത്തനങ്ങളിലും വിദ്യാഭ്യാസ വകുപ്പും ഉദ്യോഗസ്ഥരും പങ്കാളികളാവണമെന്ന് വിദ്യാഭ്യാസമന്ത്രി പ്രൊഫ. സി. രവീന്ദ്രനാഥ്. പൊതുവിദ്യാഭ്യാസ സംരക്ഷണ യജ്ഞം മേഖലാ അവലോകനയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഷൊര്‍ണ്ണൂര്‍ സെന്റ് തെരേസാസ് ഹയര്‍സെക്കന്‍ഡറി സ്‌കൂള്‍ ഓഡിറ്റോറിയത്തില്‍ നടന്ന പരിപാടിയില്‍ വിദ്യാഭ്യാസ പുനര്‍നിര്‍മിതിയില്‍ ഡി.ഡി.ഇ, ഡി.ഇ.ഒ, ഡയറ്റ് പ്രിന്‍സിപ്പല്‍മാര്‍, ഡി.പി.ഒ തുടങ്ങിയ വിദ്യാഭ്യാസ ഭരണാധികാരികളാണ് ആദ്യം മുന്നോട്ട് വരേണ്ടത്. ഭരണപരമായി ചെയ്യാനാവുന്നതെല്ലാം ചെയ്യണം. ഓരോ ജില്ലയ്ക്കും അക്കാദമിക പുനര്‍നിര്‍മാണ മാസ്റ്റര്‍ പ്ലാനും, പശ്ചാത്തല വികസന മാസ്റ്റര്‍ പ്ലാനും പ്രത്യേകം രൂപകല്‍പന ചെയ്യണം.
സാമ്പത്തിക ചെലവ് സംബന്ധിച്ച ആസൂത്രണം മുന്‍കൂട്ടി നടത്തണമെന്നും മന്ത്രി പറഞ്ഞു. ഡി.പി.ഐ. പ്രതിനിധി എ. അബൂബക്കര്‍, ഹയര്‍സെക്കന്‍ഡറി റീജിണല്‍ ഡെപ്യൂട്ടി ഡയറക്ടര്‍ ശൈലറാം, ഹൈസ്‌കൂള്‍ പ്രതിനിധി നാരായണനുണ്ണി, വി.എച്ച്.എസ്.ഇ എ.ഡി ഉബൈദുള്ള എന്നിവര്‍ സംസാരിച്ചു. പൊതുവിദ്യാഭ്യാസ സംരക്ഷണയജ്ഞം ജില്ലാ കോ-ഓര്‍ഡിനേറ്റര്‍ ടി.ജയപ്രകാശ് സ്വഗതം പറഞ്ഞു.