തിരുവനന്തപുരം: ഗീതാ ഗോപിനാഥിനെ മുഖ്യമന്ത്രിയുടെ സാമ്പത്തിക ഉപദേഷ്ടാവായി നിയമിക്കുന്നതുമായി ബന്ധപ്പെട്ട് സി.പി.എമ്മിനു പിറകേ കോണ്‍ഗ്രസിലും ഭിന്നത. ഗീതയുടെ നിയമനത്തിനെതിരേ വി.എസ് അച്യുതാനന്ദന്‍ കഴിഞ്ഞദിവസം സി.പി.എം കേന്ദ്ര നേതൃത്വത്തിന് കത്തെഴുതിയിരുന്നു. അതിനുശേഷമാണ് കോണ്‍ഗ്രസ് നേതാക്കള്‍ പ്രതികരിച്ചു തുടങ്ങിയത്. മാത്രവുമല്ല, ഈ വിഷയത്തില്‍ വ്യത്യസ്ത അഭിപ്രായങ്ങളാണ് കോണ്‍ഗ്രസ് ക്യാംപില്‍നിന്ന് ഉയര്‍ന്നുവരുന്നത്.
ഗീതാ ഗോപിനാഥിന്റെ നിയമനത്തെ കെ.പി.സി.സി പ്രസിഡന്റ് വി.എം സുധീരന്‍ കടുത്ത ഭാഷയിലാണ് വിമര്‍ശിച്ചത്. പ്രമുഖ കോണ്‍ഗ്രസ് നേതാവും സാമ്പത്തിക വിദഗ്ധനും മുന്‍ കേന്ദ്രമന്ത്രിയുമായ ജയറാം രമേശും നിയമനത്തിനെതിരേ രംഗത്തുവന്നിട്ടുണ്ട്. ഗീതയുടെ കാഴ്ചപ്പാടുകള്‍ സി.പി.എമ്മിന്റെ കാഴ്ചപ്പാടുകളുമായി യോജിച്ചുപോകുകയില്ലെന്നാണ് ജയറാം രമേശിന്റെ വിര്‍ശനം. എന്നാല്‍ നിയമനത്തെ പിന്തുണയ്ക്കുന്ന സമീപനമാണ് ശശി തരൂര്‍ എം.പിയുടേത്. ഗീതയുടെ നയപരമായ ഉപദേശങ്ങള്‍ ദീര്‍ഘകാലാടിസ്ഥാനത്തില്‍ കേരളത്തിനു ഗുണം ചെയ്യുമെന്നാണ് തരൂരിന്റെ പ്രതികരണം.
ഇതിനുപുറമേ മുന്‍ മുഖ്യമന്ത്രി ഉമ്മന്‍ ചാണ്ടിയുടെ സാമ്പത്തിക ഉപദേഷ്ടാവായിരുന്ന ശാഫി മേത്തരും ഗീതയുടെ നിയമനത്തെ പിന്തുണച്ചു രംഗത്തുവന്നിട്ടുണ്ട്. നവലിബറല്‍ കാഴ്ചപ്പാടുകളുടെ പേരില്‍ ഇതിനെ കോണ്‍ഗ്രസുകാര്‍ എതിര്‍ക്കേണ്ട കാര്യമില്ലെന്നാണ് മേത്തരുടെ വാദം. രാജീവ് ഗാന്ധിയുടെയും നരസിംഹ റാവുവിന്റെയും മന്‍മോഹന്‍ സിങിന്റെയും സര്‍ക്കാരുകള്‍ പിന്തുടര്‍ന്നത് ഇതേ നവലിബറല്‍ നയങ്ങള്‍ തന്നെയാണെന്ന് അദ്ദേഹം ചൂണ്ടിക്കാട്ടുന്നു. ഉമ്മന്‍ ചാണ്ടി ഇതുവരെ ഈ വിഷയത്തില്‍ പ്രതികരിച്ചിട്ടുമില്ല. അതേസമയം, വിഷയത്തില്‍ സി.പി.എമ്മിനുള്ളില്‍ ഭിന്നത നിലനില്‍ക്കുകയാണ്. ഗീതയെ നിയമോപദേഷ്ടാവാക്കാനുള്ള തീരുമാനം വലിയ വിവാദമായിട്ടും ധനമന്ത്രി തോമസ് ഐസക് ഇതുവരെ പ്രതികരിച്ചിട്ടില്ല. സംസ്ഥാന സെക്രട്ടറി കോടിയേരി ബാലകൃഷ്ണന്‍ നിയമനത്തെ അനുകൂലിച്ചെങ്കിലും മറ്റു പ്രമുഖ നേതാക്കളൊന്നും ഇതിനെ പിന്തുണയ്ക്കാന്‍ തയാറായിട്ടില്ല.
തന്റെ പദവിയുടെ കാര്യത്തില്‍ കടുത്ത അതൃപ്തിയുള്ള വി.എസ് ഈ വിഷയം സംസ്ഥാന നേതൃത്വത്തിനെതിരേയുള്ള ആയുധമാക്കുകയാണ്.പിണറായി സര്‍ക്കാര്‍ വലതുപക്ഷ നയങ്ങളാണ് സ്വീകരിക്കാനുദ്ദേശിക്കുന്നതെന്ന ആരോപണം പാര്‍ട്ടി പ്രവര്‍ത്തകരിലേക്കു വ്യാപിക്കാന്‍ വി.എസിന്റെ കത്ത് കാരണമായിട്ടുണ്ട്. തന്റെ കത്തിന്‍മേല്‍ പൊളിറ്റ് ബ്യൂറോ എന്തു നിലപാട് സ്വീകരിക്കുമെന്നു കാത്തിരിക്കുകയാണ് അദ്ദേഹം. ഇന്നു തുടങ്ങുന്ന പി.ബി യോഗം കത്ത് ചര്‍ച്ചയ്‌ക്കെടുക്കുമെന്നാണ് പ്രതീക്ഷിക്കുന്നത്.