പുലാമന്തോള്‍: കുന്തിപ്പുഴ മപ്പാട്ടുകര തടയണയില്‍ കുളിക്കാനിറങ്ങിയ യുവാവിനെ കാണാതായി. പൊന്നാനി തെയ്യങ്ങാട് സ്വദേശി സിയാദി (22)നെയാണ് കാണാതായത്. ഇന്നലെ ഉച്ചയ്ക്ക് 2.50ഓടെ സുഹൃത്തുക്കളുമൊത്തു വാഹനത്തിന്റെ ട്യൂബില്‍ നീന്തിക്കുളിക്കുന്നതിനിടെ സിയാദ് ട്യൂബില്‍നിന്നു പിടിവിട്ട് പുഴയില്‍ താഴ്ന്നുപോകുകയായിരുന്നു.
വെള്ളത്തില്‍ നീന്തുന്നതിനിടെ ട്യൂബ് കൈവിട്ടുപോകുകയായിരുന്നു. ട്യൂബ് എത്തിപ്പിടിക്കാന്‍ ശ്രമിച്ചെങ്കിലും കാറ്റിന്റെ കാഠിന്യത്താല്‍ അകലേക്കു പോയി. തുടര്‍ന്നു സിയാദ് നീന്താന്‍ ശ്രമിച്ചെങ്കിലും പുഴയില്‍ താഴ്ന്നുപോയി. തടയണയിലെ ആഴമേറിയ ഭാഗത്തു പാറക്കെട്ടുകള്‍ക്കു സമീപമായതിനാല്‍ വൈകിട്ടും യുവാവിനെ കണ്ടെത്തിയിട്ടില്ല. അഗ്‌നിശമനസേനാ പ്രവര്‍ത്തകരും പെരിന്തല്‍മണ്ണ പൊലിസും രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കി.