തലശ്ശേരി: പാലയാട് കാംപസിലെ ഒന്നാംവര്‍ഷ ഇംഗ്ലിഷ് ബിരുദാനന്തര വിദ്യാര്‍ഥികള്‍ക്ക് അടുത്തമാസം നടക്കുന്ന ഒന്നാംസെമസ്റ്റര്‍ പരീക്ഷ രജിസ്റ്റര്‍ ചെയ്യുന്നതിനു തടസമുള്ളതായി ആരോപിച്ച് വിദ്യാര്‍ഥികള്‍ കുത്തിയിരിപ്പ് സമരം നടത്തി.
ഡിപ്പാര്‍ട്ട്‌മെന്റ് അധികാരികളില്‍നിന്നു ലഭിച്ച നിര്‍ദേശപ്രകാരം നിലവിലുള്ള അഞ്ച് പേപ്പറുകളില്‍ വുമണ്‍സ് റൈറ്റിങ് എന്ന പേപ്പര്‍ ഒഴിവാക്കി ബാക്കിയുള്ള നാലുപേപ്പറുകള്‍ രജിസ്റ്റര്‍ ചെയ്‌തെങ്കിലും പരീക്ഷയ്ക്ക് ഒരുമാസം ബാക്കിനില്‍ക്കെ ഒഴിവാക്കിയ പേപ്പര്‍ വീണ്ടും ഉള്‍പ്പെടുത്തിയതായി വിവരം ലഭിച്ചിരുന്നു. ഇത് ബുദ്ധിമുട്ടുണ്ടാക്കിയതായി ആരോപിച്ചാണു വിദ്യാര്‍ഥികള്‍ വകുപ്പ് മേധാവിയുടെ ഓഫിസിനു മുന്നില്‍ കുത്തിയിരിപ്പ് സമരം നടത്തിയത്.
ഡിപ്പാര്‍ട്ട്‌മെന്റിനു സംഭവിച്ച വീഴ്ച തങ്ങളുടെ മേല്‍ കെട്ടിവയ്ക്കുന്നതു വഞ്ചനപരമാണെന്നു വിദ്യാര്‍ഥികള്‍ പറഞ്ഞു. തങ്ങളുടെ ഭാവി സുരക്ഷിതമാക്കണമെന്ന് ആവശ്യപ്പെട്ട് വകുപ്പ് മേധിവിക്കു നിവേദനം നല്‍കി.