പാണ്ടിക്കാട്: മുറ്റമടിക്കാന്‍ പുറത്തിറങ്ങിയ വീട്ടമ്മയെ തള്ളിമാറ്റി വീട്ടില്‍കയറി മോഷണം. പുളിക്കല്‍പറമ്പ് കുറ്റിപ്പുളി റോഡില്‍ കുളപ്പറമ്പ് റോഡ് ജങ്ഷനോടു ചേര്‍ന്ന് ഒറ്റയ്ക്കു താമസിക്കുന്ന പട്ടിക്കാടന്‍ പാത്തുമ്മ (62) യെ അക്രമിച്ചാണ് സ്വര്‍ണം കവര്‍ന്നത്.
ഇന്നലെ രാവിലെ 8.30ഓടെ ഉമ്മറവാതില്‍ പടിയില്‍ വായും മൂക്കും പൊത്തി തള്ളിമാറ്റിയ ശേഷം വീട്ടിനുള്ളില്‍ കയറി മേശയില്‍ സൂക്ഷിച്ച മൂന്നു മാലകളും ഒരു മോതിരവുമുള്‍പ്പെടെ മൂന്നു പവനോളം തൂക്കംവരുന്ന സ്വര്‍ണാഭരണങ്ങളാണ് കവര്‍ന്നത്. രാവിലെ വീടിന്റെ ഉള്‍ഭാഗം തുടച്ചു വൃത്തിയാക്കിയ ശേഷം മുറ്റമടിക്കാന്‍ ചൂലുമായി വീടീന്റെ മുന്‍വശത്തെ വാതില്‍ തുറന്നു വരുന്നതിനിടെ മോഷ്ടാവ് വായയും മൂക്കും പൊത്തി തള്ളിയിടുകയും വീട്ടിനുള്ളില്‍ കയറുകയുമായിരുന്നു.
പെട്ടെന്നുള്ള ആക്രമണത്തില്‍ പകച്ച വീട്ടമ്മയ്ക്ക് ഒച്ചവയ്ക്കാനായില്ല. ഏറെ സമയം കഴിഞ്ഞാണ് അയല്‍പക്കത്തുള്ളവര്‍ വിവരമറിഞ്ഞത്. ഏതാനും മാസങ്ങള്‍ക്കു മുന്‍പ് ഇപ്പോള്‍ കവര്‍ച്ച നടന്ന വീട്ടില്‍നിന്ന് 250 മീറ്ററോളം അകലെ മുട്ടിച്ചിറക്കല്‍ വാല്‍പറമ്പത്ത് നബീസ എന്ന വൃദ്ധയുടെ മാല ബൈക്കില്‍ വന്ന യുവാവ് പൊട്ടിച്ചെടുത്തിരുന്നു. രണ്ടാഴ്ച മുന്‍പു കുറ്റിപ്പുളിയില്‍ കുടിക്കാന്‍ വെള്ളം ചോദിച്ചെത്തിയ യുവാവ് കടുവപ്പാലി കുഞ്ഞിമൊയ്തീന്റെ ഭാര്യ കുഞ്ഞിക്കദിയയെ ബക്കറ്റ് കയര്‍ കഴുത്തില്‍ കുരുക്കി ചവിട്ടിവീഴ്ത്തി കൈയിലെ സ്വര്‍ണ വള തട്ടിയെടുത്തിരുന്നു.
ഇതിനിടെയാണ് ഇന്നലെ വീണ്ടും സമാനരീതിയില്‍ കവച്ച നടന്നത്. മലപ്പുറം ഡോഗ്‌സ്‌ക്വാഡിലെ ലിസ എന്ന പൊലിസ് നായ കവര്‍ച്ച നടന്ന വീട്ടില്‍ മണം പിടിച്ച ശേഷം തൊട്ടടുത്ത വയലില്‍വരെ എത്തി. മൊബൈല്‍ ഫോറന്‍സിക് വിഭാഗവും വീട്ടിലെത്തി തെളിവെടുപ്പ് നടത്തി. പാണ്ടിക്കാട് എസ്.ഐ സത്യശീലന്‍, എ.എസ്.ഐമാരായ സുരേഷ്ബാബു, അബ്ദുല്‍ റസാഖ് എന്നിവരുടെ നേതൃത്വത്തില്‍ പൊലിസ് സംഘവും സ്ഥലത്തെത്തി കേസെടുത്ത് അന്വേഷണം ആരംഭിച്ചു.