പാലക്കാട്: രാജ്യത്തെ 255 ജില്ലകളിലായി 756 നഗരപ്രദേശങ്ങളും 4387 ഗ്രാമപ്രദേശങ്ങളും ജലദൗര്‍ലഭ്യം നേരിടുന്നതായി കേന്ദ്ര ഗ്രൗണ്ട് വാട്ടര്‍ എസ്റ്റിമേറ്റ് കമ്മിറ്റി നടത്തിയ പുതിയ പഠനങ്ങള്‍ വ്യക്തമാക്കുന്നു. രാജ്യം കടുത്ത ജലക്ഷാമത്തിലേക്ക് നീങ്ങുകയാണെന്ന് കേന്ദ്ര സര്‍ക്കാരിന് നല്‍കിയ റിപ്പോര്‍ട്ടില്‍ പറയുന്നു. തമിഴ്‌നാട്, രാജസ്ഥാന്‍, ഉത്തര്‍പ്രദേശ,് ഡല്‍ഹി എന്നിവിടങ്ങളിലെ നഗരങ്ങളാണ് ഈ പട്ടികയില്‍ ഏറ്റവും കൂടുതല്‍ ഉള്‍പ്പെട്ടിരിക്കുന്നത്

കേരളത്തിലെ സ്ഥിതിയും ആശങ്കപ്പെടുത്തുന്നതാണെന്ന് റിപ്പോര്‍ട്ട് സൂചിപ്പിക്കുന്നു. സംസ്ഥാനത്തെ ജലസുരക്ഷിത ബ്ലോക്കുകളുടെ എണ്ണം 131ല്‍ നിന്ന് 119 ആയി കുറഞ്ഞെന്നാണ് കണക്ക്. ജലത്തിന്റെ ഉപയോഗം 70 ശതമാനത്തില്‍ താഴെയുള്ള മേഖലകളെയാണ് ജലസുരക്ഷിത ബ്ലോക്കുകള്‍ എന്ന് വിശേഷിപ്പിക്കുന്നത്. ജലലഭ്യതയും അവിടെ ജലത്തിന്റെ ചെലവ് 100 ശതമാനത്തിനും മുകളിലുള്ള മേഖലകളെ അതിചൂഷണ ബ്ലോക്കുകള്‍ എന്നും 70-90 ശതമാനം വരെ ജലം ചെലവഴിക്കുന്ന മേഖലകളെ ഭാഗിക ഗുരുതര മേഖലകളെന്നും വിളിക്കുന്നു.

നദികള്‍, തടാകങ്ങള്‍ എന്നിവയിലെ മലിനീകരണം, നഗരവല്‍ക്കരണം, ഭൂഗര്‍ഭ ജലത്തിന്റെ അമിത ഉപയോഗം, ജനസംഖ്യാ വര്‍ധന തുടങ്ങിയ കാര്യങ്ങളും ജലക്ഷാമത്തിന്റെ തീവ്രത വര്‍ധിപ്പിക്കുന്നു. വികസ്വര രാജ്യങ്ങളെ സംബന്ധിച്ചിടത്തോളം ജലക്ഷാമം ഗുരുതരമായ പ്രതിസന്ധി സൃഷ്ടിക്കുമെന്നും റിപ്പോര്‍ട്ടില്‍ പറയുന്നു. ഓരോവര്‍ഷവും പ്രതിശീര്‍ഷ ജലത്തിന്റെ അളവ് ഗണ്യമായി കുറയുന്നു. 1951 ല്‍ പ്രതിശീര്‍ഷ ജലത്തിന്റെ തോത് 5177 ഘനമീറ്റര്‍ ആയിരുന്നത് 2019ല്‍ 1720 ഘനമീറ്ററായി കുറഞ്ഞു. ഓരോ വര്‍ഷവും രാജ്യത്തെ ജലവിതാനത്തിന്റെ തോത് 0.3 മീറ്റര്‍ കുറയുന്നതായാണ് നാസ റിപ്പോര്‍ട്ട് ചെയ്തിട്ടുള്ളത്. 2030 ആകുമ്പോള്‍ ഇപ്പോഴത്തെക്കാള്‍ 50 ശതമാനം കൂടുതല്‍ ജലദൗര്‍ലഭ്യത രാജ്യത്ത് അനുഭവപ്പെടുമെന്നാണ് എ.ഡി.ബിയുടെ കണക്കുകള്‍ സൂചിപ്പിക്കുന്നത്.