പറവൂര്‍: മുന്‍സിപ്പല്‍ ഓഫിസിന് എതിര്‍വശത്തുള്ള പഴയപാര്‍ക്കില്‍ കടമുറികള്‍ നിര്‍മിക്കാനും നഗരത്തിന്റെ ഹൃദയഭാഗമായ പാര്‍ക്കിന്റെ ഏതാനും സ്ഥലങ്ങള്‍ പേ ആന്‍ഡ് പാര്‍ക്കിങ് കേന്ദ്രമാക്കാനുമുള്ള നീക്കം ഉപേക്ഷിക്കണമെന്ന ആവശ്യം ശക്തമാകുന്നു.
യാതൊരുവിധ നിര്‍മാണപ്രവര്‍ത്തനങ്ങളും നടത്താതെ  ജനങ്ങള്‍ക്ക് ഒത്തുകൂടാനും സാംസ്‌കാരിക വിനിമയ പരിപാടികള്‍ സംഘടിപ്പിക്കാനുള്ള വേദിയാക്കി പാര്‍ക്ക് മാറ്റണമെന്ന് സാംസ്‌കാരിക സംഘടനകള്‍ ആവശ്യപ്പെട്ടു.
കഴിഞ്ഞ എല്‍.ഡി.എഫ് ഭരണകാലത്ത് ഈ സ്ഥലത്ത് പി.പി.പി പദ്ധതി പ്രകാരം എഴുപതിനായിരം സ്‌ക്വയര്‍ ഫീറ്റില്‍ ഏഴുനില കെട്ടിടം പണിയുന്നതിന് നടപടികള്‍ പൂര്‍ത്തിയായപ്പോള്‍ അന്നത്തെ യു.ഡി.എഫ് അംഗങ്ങള്‍ ശക്തമായ എതിര്‍പ്പുമായി മുന്നോട്ടുവരികയും പദ്ധതി ഉപേക്ഷിക്കുകയും ചെയ്തിരുന്നു. എന്നാല്‍ ഇപ്പോഴത്തെ ഭരണസമിതിയുടെ നീക്കത്തിനെതിരേ പ്രതിഷേധം ശക്തമാണ്.