ദമാം: സഊദി ദേശീയ ദിനത്തോട് ഐക്യ ദാര്‍ഢ്യം പ്രഖ്യാപിച്ചു കൊണ്ട് കെ.എം.സി.സി നാഷണല്‍ കമ്മിറ്റി സൗദി വ്യാപകമായി സംഘടിപ്പിക്കുന്ന രക്തദാന ക്യാമ്പയ്‌നിന്റെ ഭാഗമായി ജുബൈല്‍ കെ.എം.സി.സി സെന്‍ട്രല്‍ കമ്മിറ്റിയുടെ ആഭിമുഖ്യത്തില്‍ ജുബൈലില്‍ രക്തദാന ക്യാമ്പ് സംഘടിപ്പിച്ചു.

ജുബൈല്‍ ജനറല്‍ ആശുപത്രി രക്ത ബാങ്കില്‍ നടന്ന ക്യാമ്പിലേക്ക് രക്തം ദാനം ചെയ്യാന്‍ സെന്‍ട്രല്‍ കമ്മിറ്റിയില്‍നിന്നും ,വിവിധ ഏരിയ കമ്മിറ്റികളില്‍ നിന്നുള്ള പ്രവര്‍ത്തകര്‍ക്കൊപ്പം സാമൂഹ്യ സാംസ്‌കാരിക രാഷ്ട്രീയ രംഗത്തുള്ളവരും ഉള്‍പ്പെടെ നൂറു കണക്കിന് ആളുകള്‍ എത്തിയിരുന്നു.ഒരേ സമയം എട്ടോളം ബെ ഡുകളിലായിട്ടാണ് രക്തം സ്വീകരിക്കാനുള്ള സൗകര്യം ഒരുക്കിയിരുന്നത്. രക്തം സ്വീകരിക്കാനായി എത്തിയവരെ ഹൃദ്യമായ രീതിയില്‍ മധുരം നല്‍കിയാണ് ബ്ലഡ് ബാങ്ക് ജീവനക്കാര്‍ സ്വീകരിച്ചത്.

വൈകീട്ട് നാല് മണിക്ക് ആരംഭിച്ച രക്തദാന ക്യാമ്പ് ജുബൈല്‍ ജനറല്‍ ഹോസ്പിറ്റില്‍ ബ്ലഡ് ബാങ്ക് കോഓര്‍ഡിനേറ്റര്‍ ഹുസൈന്‍ അല്‍ വാമി ഉദ്ഘാടനം ചെയ്തു. കെ.എം.സി.സി നാഷണല്‍ കമ്മിറ്റി വെല്‍ഫെയര്‍ വിങ് ചെയര്‍മാന്‍ യു.എ റഹീം അധ്യക്ഷനായിരുന്നു.ബ്ലഡ് ബാങ്ക് ജീവനക്കാരായ ഹൈദര്‍ ഹമദ്, അലി അല്‍ തലവാഹ്,സലിം അല്‍ ശംറാനി, ജുബൈല്‍ കെ.എം.സി.സി ഭാരവാഹികളായ ഉസ്മാന്‍ ഒട്ടുമ്മല്‍, ഇബ്രാഹിം കുട്ടി താനൂര്‍, കുട്ടി എടപ്പാള്‍, അബ്ദുല്‍ സലാം ആലപ്പുഴ, സൈതലവി പരപ്പനങ്ങാടി, ഇല്യാസ്,ജമാല്‍ കോയപള്ളി, ബഷീര്‍ താനൂര്‍, ശിഹാബ് കൊടുവള്ളി, ആലിക്കോയ ഫറോക്, അസീസ് ഉണ്യാല്‍, ബഷീര്‍ വെട്ടുപാറ, നൗഷാദ് കെ.എസ് പുരം, പ്രൊഫ.അമീര്‍ അസ്ഹര്‍, അബ്ദുല്‍ ഹമീദ് എറണാംകുളം, ശരീഫ് ആലുവ എന്നിവര്‍ നേതൃത്വം നല്‍കി. ജുബൈല്‍ കെ.എം.സി.സി സെന്‍ട്രല്‍ കമ്മിറ്റി സെക്രട്ടറി അഷ്‌റഫ് ചെട്ടിപ്പടി സ്വാഗതവും, ട്രഷറര്‍ നൗഷാദ് തിരുവനന്തപുരം നന്ദിയും പറഞ്ഞു.