തൃപ്പൂണിത്തുറ: നഗരസഭയില്‍ ചക്കംകുളങ്ങരയില്‍ 28ന്  നടന്ന തെരെഞ്ഞെടുപ്പില്‍ യു.ഡി.എഫ് സ്ഥാനാര്‍ഥി ശബരിഗിരീഷ് 94 വോട്ടിന്റെ ഭൂരിപക്ഷത്തിന് വിജയിച്ചു.
ആകെ 1030 വോട്ടുകള്‍ പോള്‍ ചെയ്തപ്പോള്‍ 466 വോട്ടുകള്‍ യു.ഡി.എഫ് സ്ഥാനാര്‍ഥി ശബരിഗിരീഷനും 372 വോട്ടുകള്‍ ബി.ജെ.പി സ്ഥാനാര്‍ഥി വിശാലാക്ഷി വേണുഗോപാലിനും 192 വോട്ടുകള്‍ എല്‍.ഡി.എഫ് സ്ഥാനാര്‍ഥി രാജേഷ് പൈ യും നേടി.
കഴിഞ്ഞ തെരെഞ്ഞെടുപ്പില്‍ വിജയിച്ച ബി.ജെ.പി സ്ഥാനാര്‍ഥി വേണുഗോപാല്‍ മരിച്ചതിനെ തുടര്‍ന്നാണ് ഈ ഡിവിഷനില്‍ ഉപതെരെഞ്ഞെടുപ്പ് നടത്തിയത്.
കഴിഞ്ഞ തവണ യു.ഡി.എഫ് സ്ഥാനാര്‍ഥിയായിരുന്ന ശബരി ഗിരീഷന്‍ അഞ്ച് വോട്ടുകള്‍ക്കാണ് ബി.ജെ.പി സ്ഥാനാര്‍ഥിയോട് തോറ്റത്.
സ്ഥിരം യു.ഡി.എഫ് വിജയിച്ചിരുന്ന സീറ്റ് കഴിഞ്ഞ തവണ ബി.ജെ.പി നേടുകയും യു.ഡി.എഫ് ഭരിച്ചിരുന്ന നഗരസഭ ഭരണം കൈവിട്ട് പോവുകയും മൂന്നാം സ്ഥാനത്തേക്ക് യു.ഡി.എഫ് പിന്തള്ളപ്പെടുകയും ചെയ്തിരുന്നു. എല്‍.ഡി.എഫ് 25 സീറ്റുകള്‍ നേടി വര്‍ഷങ്ങള്‍ക്ക് ശേഷം ചരിത്ര വിജയം കുറിച്ചിരുന്നു.
ഈ വിജയത്തോടെ ബി.ജെ.പിക്കും യു.ഡി.എഫിനും 12 സീറ്റുകള്‍ വീതമായി. നേരത്തേ ഒരു സീറ്റിന്റെ കുറവുണ്ടായിരുന്നതിനാല്‍ ബി.ജെ.പിയായിരുന്നു മുഖ്യ പ്രതിപക്ഷം.
മരിച്ച വേണുഗോപാലിന്റെ ഭാര്യയായിരുന്നു ഇത്തവണ ബി.ജെ.പിക്ക് വേണ്ടി മത്സരിച്ചത്.