ആര്‍പ്പൂക്കര: മരണപ്പെട്ട തമിഴ്‌നാട് സ്വദേശിനിയായ വീട്ടമ്മയുടെ മൃതദേഹം  ബന്ധുക്കള്‍ കാറില്‍ ഇരുത്തി നാട്ടിലേക്ക് കൊണ്ടുപോയത് പൊലിസ് പിടികൂടി.തുടര്‍ന്ന് കോട്ടയം മെഡിക്കല്‍ കോളജില്‍ എത്തി്ച്ച് പോസ്റ്റ്‌മോര്‍ട്ടം നടത്തി. കോട്ടയം പുത്തനങ്ങാടിയില്‍ താമസിക്കുന്ന ലക്ഷ്മി(60)യുടെ മൃതദേഹമാണ് ഇന്നലെ രാവിലെ ഭര്‍ത്താവും ബന്ധുക്കളും ചേര്‍ന്ന് കാറില്‍ ഇരുത്തി തമിഴ്‌നാട്ടിലേക്ക് കൊണ്ടുപോയത്.
 25 വര്‍ഷമായി  പുത്തനങ്ങാടിയില്‍ താമസിച്ചുകൊണ്ട് അലൂമിനീയം പാത്രങ്ങളുടെ ഹോള്‍സെയില്‍ നടത്തുകയാണ് ലക്ഷ്മിയും ഭര്‍ത്താവും. ചൊവ്വാഴ്ച രാത്രി ഉറങ്ങാന്‍ കിടന്ന ലക്ഷ്മി രക്തസമ്മര്‍ദ്ദം കൂടി മരണപ്പെട്ടു.  ഇന്നലെ രാവിലെയാണ് ഭര്‍ത്താവ് ഈ വിവരം അറിയുന്നത്. രാവിലെ ലക്ഷ്മിയുടെ ശരീരം അനക്കമില്ലാതെ തണുത്തിരുന്നതിനാല്‍ ഭര്‍ത്താവും സമീപത്ത് താമസിക്കുന്ന ബന്ധുക്കളും  ആശുപത്രിയില്‍ കൊണ്ടുപോകാതെ മരണം ഉറപ്പാക്കി.മറ്റു നടപടികള്‍ക്ക് നില്‍ക്കാതെ  ബന്ധുവിന്റെ കാറില്‍ ലക്ഷ്മിയുടെ മൃതദേഹം ഇരുത്തി തമിഴ്‌നാട്ടിലേക്ക് പുറപ്പെട്ടു.
കാറില്‍ മൃതദേഹവുമായി വരുന്ന വിവരം ചെങ്ങന്നൂര്‍ പൊലിസിനെ അറിയിച്ചതിനെ തുടര്‍ന്ന് പൊലിസ് നടത്തിയ പരിശോധനയില്‍ രാവിലെ8.30ന്  കല്ലിശേരിയില്‍ വച്ച് മൃതദേഹം പിടികൂടി.