അഷറഫ് ചേരാപുരം
കോഴിക്കോട്: വരാനിരിക്കുന്നത് ജലദൗര്‍ലഭ്യത്തിന്റെ ഭീതിതമായ നാളുകളെന്ന ഓര്‍മപ്പെടുത്തലുകള്‍ക്കിടയിലും ജലസംരക്ഷണത്തെക്കുറിച്ച് മലയാളിക്ക് ഇനിയും ജാഗ്രതയില്ലാത്ത അവസ്ഥ. ചെന്നൈ ഉള്‍പ്പെടെയുള്ള നഗരങ്ങളില്‍ അനുഭവപ്പെടുന്ന കുടിവെള്ളക്ഷാമത്തിന്റെ തീക്ഷ്ണതയില്‍നിന്ന് നമ്മള്‍ ഇനിയും പാഠം പഠിക്കാത്തതെന്തെന്ന പരിസ്ഥിതി പ്രവര്‍ത്തകരുടെ ചോദ്യവുമുയരുന്നുണ്ട്. ജൂലൈ പകുതിയോടടുത്തിട്ടും കേരളത്തില്‍ മണ്‍സൂണ്‍ ശക്തിപ്പെടാത്തപ്പോഴാണ് ഈ ആശങ്കകള്‍ ഇരട്ടിക്കുന്നത്.സംസ്ഥാനത്തെ എഴുപത് ശതമാനം തദ്ദേശസ്വയംഭരണ സ്ഥാപനങ്ങളിലെ ജനങ്ങള്‍ ഇപ്പോഴും കടുത്ത ജലദൗര്‍ലഭ്യം നേരിടുകയാണെന്നാണ് റിപ്പോര്‍ട്ട്.
ജൂണില്‍ സംസ്ഥാനത്ത് 44 ശതമാനം മഴക്കമ്മി ഉണ്ടായിട്ടുണ്ട്, ജൂലൈയിലുംസ്ഥിതി മാറിയിട്ടില്ല. ജൂലൈ 11 വരെ 43 ശതമാനമാണ് മഴക്കമ്മി. എന്നാല്‍ വടക്കെ മലബാറിലുള്‍പ്പെടെ പല പ്രദേശങ്ങളിലും ലഭിക്കുന്ന മഴ വേണ്ട വിധത്തില്‍ ഉപയോഗപ്പെടുത്താന്‍ കഴിഞ്ഞിട്ടില്ലെന്നതാണ് വസ്തുത. പെയ്യുന്ന മഴവെള്ളത്തിന്റെ ഭൂരിഭാഗവും കടലിലേക്ക് ഒഴുകിപ്പോകുന്ന അവസ്ഥയാണുള്ളത്. തെക്കുപടിഞ്ഞാറന്‍ മണ്‍സൂണ്‍ സാധാരണയായി ജൂണ്‍ ഒന്നിനാണ് കേരളത്തില്‍ എത്താറുള്ളത്.പിന്നീട് ഒരു മാസത്തേക്ക് സംസ്ഥാനത്തുടനീളം നല്ല മഴ ലഭിക്കാറുണ്ട് .
ഇത്തവണ കാലവര്‍ഷം തുടങ്ങി ഒരു മാസം പിന്നിട്ടപ്പോള്‍ ഇതുവരെ ശരാശരിക്ക് മുകളില്‍ മഴ ലഭിച്ചത് ആറ് ദിവസം മാത്രമാണ്. ഇനി മണ്‍സൂണിന്റെ അടുത്ത ഘട്ടത്തിലാണ് പ്രതീക്ഷ. എന്നാല്‍ ജൂലൈ അവസാനത്തോടെ മഴ ശക്തിപ്പെട്ടാലും സംസ്ഥാനത്ത് വരും മാസങ്ങളില്‍ കടുത്ത ജലദൗര്‍ലഭ്യം ഉണ്ടാകുമെന്നാണ് കോഴിക്കോട് ആസ്ഥാനമായുള്ള സെന്റര്‍ ഫോര്‍ വാട്ടര്‍ റിസോഴ്‌സ് ഡെവലപ്‌മെന്റ് ആന്‍ഡ് മാനേജ്‌മെന്റിലെ (സി.ഡബ്ല്യു.ആര്‍.ഡി.എം) മുതിര്‍ന്ന ശാസ്ത്രജ്ഞന്‍ വി.പി ദിനേശന്‍ മുന്നറിയിപ്പ് നല്‍കുന്നത്.
മഴയുടെ ലഭ്യത എന്തുതന്നെയായാലും ഭൂമിയില്‍വെള്ളം സംഭരിക്കപ്പെടുന്നില്ല. കഴിഞ്ഞ വര്‍ഷത്തെ വെള്ളപ്പൊക്കം നദികളിലെ മണല്‍ ബെഡ് ഒഴുക്കിക്കളഞ്ഞിട്ടുണ്ട്. പകരം അവ അലുവിയം (എക്കല്‍) അവശിഷ്ടങ്ങള്‍ കൊണ്ട് നിറച്ചു. ഈസാഹചര്യം മഴവെള്ളം ഭൂമിയിലേക്ക് ഒഴുകുന്നത് തടയുകയാണ്. ഇപ്പോള്‍ കേരളത്തിലെ മണ്ണില്‍ പതിക്കുന്ന മഴവെള്ളം അടുത്ത 22 മണിക്കൂറിനുള്ളില്‍ കടലില്‍ എത്തുകയാണെന്നും അദ്ദേഹം ചൂണ്ടിക്കാട്ടി. അടിയന്തര നടപടിയായി സംസ്ഥാനത്തെ 45,000 കുളങ്ങള്‍ സംരക്ഷിക്കാന്‍ സി.ഡബ്ല്യു.ആര്‍.ഡി.എംസംസ്ഥാന സര്‍ക്കാരിനെ ഉപദേശിച്ചിട്ടുണ്ട്. ഈ കുളങ്ങളുടെ സംരക്ഷണം കിണറുകള്‍ റീചാര്‍ജ് ചെയ്യാന്‍ സഹായിക്കും. കേരളത്തിലെ ഡാമുകളില്‍ ഇപ്പോള്‍ അവശേഷിക്കുന്ന വെള്ളത്തിന്റെ അളവ് തമിഴ്‌നാട്ടിലെ ഡാമുകളില്‍ നിലവിലുള്ള വെള്ളത്തേക്കാള്‍ കുറവാണെന്നും ഏജന്‍സി കണ്ടെത്തിയിട്ടുണ്ട്. കിണര്‍ റീചാര്‍ജിങ് ഉള്‍പ്പെടെയുള്ള സംവിധാനങ്ങള്‍ കൂടുതല്‍ കാര്യക്ഷമമാക്കാനുള്ള പ്രവൃത്തികള്‍ക്ക് സര്‍ക്കാര്‍ മുന്‍കൈയെടുക്കണമെന്ന ആവശ്യവും പരക്കെ ഉയര്‍ന്നിട്ടുണ്ട്.