കൊച്ചി: നെടുമ്പാശ്ശേരി അന്താരാഷ്ട്ര വിമാനത്താവളത്തിന്റെ ഓഹരിയുടമകള്‍ക്ക് 2017-18 സാമ്പത്തിക വര്‍ഷം 25 ശതമാനം ലാഭവിഹിതം നല്‍കാനുള്ള ഡയരക്ടര്‍ ബോര്‍ഡിന്റെ ശുപാര്‍ശ വാര്‍ഷിക പൊതുയോഗം അംഗീകരിച്ചു. പ്രളയാനന്തര കേരളത്തിന്റെ പുനരുദ്ധാരണ പ്രവര്‍ത്തനങ്ങള്‍ക്കായി ലാഭവിഹിതത്തിന്റെ ഒരു ഭാഗം ദുരിതാശ്വാസ നിധിയിലേക്ക് സംഭാവന നല്‍കാന്‍ സിയാലിന്റെ ചെയര്‍മാന്‍കൂടിയായ മുഖ്യമന്ത്രി പിണറായി വിജയന്‍ അഭ്യര്‍ഥിച്ചു.
മുഖ്യമന്ത്രിയുടെ ദുരിതാശ്വാസ നിധിയിലേക്ക് സിയാല്‍ ജീവനക്കാരുടെ ഒരു മാസത്തെ ശമ്പളമായ 2.9 കോടി രൂപ സിയാല്‍ സ്റ്റാഫ്, ഓഫിസേഴ്‌സ് സംഘടനാ പ്രതിനിധികള്‍ മുഖ്യമന്ത്രിക്കു കൈമാറി. ഐക്യരാഷ്ട്രസഭയുടെ ചാംപ്യന്‍ ഓഫ് എര്‍ത്ത് പുരസ്‌കാര ട്രോഫി മാനേജിങ് ഡയരക്ടര്‍ വി.ജെ കുര്യന്‍ മുഖ്യമന്ത്രിക്ക് സമര്‍പ്പിച്ചു. കഴിഞ്ഞ സാമ്പത്തിക വര്‍ഷം 553.42 കോടി രൂപയുടെ മൊത്തവരുമാനമാണ് സിയാല്‍ നേടിയത്. മുന്‍ സാമ്പത്തിക വര്‍ഷത്തേക്കാള്‍ 13.57 ശതമാനമാണിത്.
387.93 കോടി രൂപയാണ് കമ്പനിയുടെ പ്രവര്‍ത്തന ലാഭം. നികുതി, പുതിയ അന്താരാഷ്ട്ര ടെര്‍മിനലിന്റെ പ്രവര്‍ത്തനാരംഭം മൂലമുണ്ടായ തേയ്മാനച്ചെലവ് എന്നിവകൂടി കണക്കിലെടുത്താല്‍ 158.42 കോടി രൂപയുടെ ലാഭം 2017-18 സാമ്പത്തിക വര്‍ഷം രേഖപ്പെടുത്തിയിട്ടുണ്ട്. 25 ശതമാനം ലാഭവിഹിതമെന്നത് അംഗീകരിച്ചതോടെ 2003-04 സാമ്പത്തിക വര്‍ഷം മുതല്‍ ഇതുവരെ 228 ശതമാനം ലാഭവിഹിതം ഓഹരിയുടമകള്‍ക്ക് ലഭിക്കും.
പൂര്‍ണമായും സൗരോര്‍ജത്താല്‍ പ്രവര്‍ത്തിക്കുന്ന വിമാനത്താവളമെന്ന ആശയം നടപ്പിലാക്കിയതിന് ഐക്യരാഷ്ട്രസഭയുടെ പരമോന്നത പരിസ്ഥിതി പുരസ്‌കാരമായ 'ചാംപ്യന്‍ ഓഫ് എര്‍ത്ത് ' നേടാന്‍ കഴിഞ്ഞതില്‍ ചാരിതാര്‍ഥ്യമുണ്ടെന്ന് മുഖ്യമന്ത്രി അറിയിച്ചു. വാര്‍ഷിക പൊതുയോഗത്തില്‍ മുഖ്യമന്ത്രി പിണറായി വിജയന്‍ അധ്യക്ഷനായി. മന്ത്രിമാരായ തോമസ് ഐസക്, മാത്യു ടി. തോമസ്, വി.എസ് സുനില്‍കുമാര്‍, സിയാല്‍ മാനേജിങ് ഡയരക്ടര്‍ വി.ജെ കുര്യന്‍, ഡയരക്ടര്‍മാരായ കെ. റോയ് പോള്‍, എ.കെ രമണി, എം.എ യൂസഫലി, സി.വി ജേക്കബ്, എന്‍.വി ജോര്‍ജ്, ഇ.എം ബാബു, കമ്പനി സെക്രട്ടറി സജി കെ. ജോര്‍ജ്, ചീഫ് ഫിനാന്‍ഷ്യല്‍ ഓഫിസര്‍ സുനില്‍ ചാക്കോ തുടങ്ങിയവര്‍ പങ്കെടുത്തു.