ചീക്കല്ലൂര്‍: ചീക്കല്ലൂര്‍ ചെക്ക്ഡാമിന് സമീപത്തെ പുഴയില്‍ ആദിവാസി വയോധിക വീണതായി സംശയം.
നാട്ടുകാരും ഫയര്‍ഫോയ്‌സും തുര്‍ക്കി ജീവന്‍ രക്ഷാ സമിതി പ്രവര്‍ത്തകരും തിരച്ചില്‍ നടത്തിയെങ്കിലും കണ്ടെത്താനായില്ല. ചീക്കല്ലൂര്‍ ചെക്ക്ഡാമിനടുത്ത് നാടുകാണി കോളനിയിലെ കറപ്പിയാ(65)ണ് പുഴയില്‍ വീണതായി സംശയിക്കുന്നത്. പുഴയോരത്ത് ഇവരുടെ ചെരുപ്പ് ഉപേക്ഷിക്കപ്പെട്ട നിലയിലാണ്. കറപ്പിയുടെ വീട് പുഴയോട് ചേര്‍ന്നാണ്. പാത്രം കഴുകാനും തുണി അലക്കാനും മറ്റും സാധാരണ ഇവര്‍ പുഴയില്‍ എത്താറുണ്ട്.
ഇന്നലെ ഉച്ചയോടെയാണ് കറപ്പിയെ കാണാതായതായി സംശയമുയര്‍ന്നത്. ഇതിനെ ബലപ്പെടുത്തുന്ന തരത്തില്‍ ഇവരുടെ ചെരിപ്പും ഡാമിന് മുകളിലായി കണ്ടെത്തി. ഇതോടെ നാട്ടുകാര്‍ പൊലിസിനെ വിവരമറിയിച്ചു. തുടര്‍ന്ന് സ്ഥലത്തെത്തിയ കമ്പളക്കാട് പൊലിസും നാട്ടുകാരും ഫയര്‍ഫോഴ്‌സും ചേര്‍ന്ന് നടത്തിയ തിരച്ചില്‍ ഫലം കാണാതായതോടെ തുര്‍ക്കി ജീവന്‍ രക്ഷാ സമിതി പ്രവര്‍ത്തകരെയും ചീക്കല്ലൂരിത്തിച്ചു. ഇവരും തിരച്ചിലില്‍ ഏര്‍പ്പെട്ടു.
എന്നാല്‍ വൈകിയും ഒന്നും കണ്ടെത്താന്‍ സാധിച്ചില്ല. ഇതോടെ തിരച്ചില്‍ ഇന്നത്തേക്ക് മാറ്റി. ചെക്ക്ഡാമിന് സമീപം നല്ല ഒഴുക്കാണ് അനുഭവപ്പെടുന്നത്. ഇത് തിരച്ചിലിനെ പ്രതികൂലമായി ബാധിച്ചു. കഴിഞ്ഞ ദിവസങ്ങളില്‍ പെയ്ത മഴയാണ് ഒഴുക്ക് ശക്തമാകാന്‍ കാരണം.