അര്‍ജന്റീനിയന്‍ ഫുട്‌ബോള്‍ കോച്ച് അലജാന്‍ഡ്രോ സാബെല്ല അന്തരിച്ചു. 66 വയസായിരുന്നു. അര്‍ജന്റീനയെ 2014 ലെ ലോകകപ്പ് ഫൈനലിലെത്തിച്ച പരിശീലകനാണ് സാബെല്ല.

ഹൃദയ സംബന്ധമായ അസുഖത്തെ തുടര്‍ന്ന് ചികിത്സയിലായിരുന്നു അദ്ദേഹം. രോഗം അധികരിച്ചതിനെ തുടര്‍ന്ന് നവംബര്‍ 26നാണ് അദ്ദേഹത്തെ ആശുപത്രയില്‍ പ്രവേശിപ്പിച്ചത്. ഏതാണ്ട രണ്ടാഴ്ചയോളമായി അദ്ദേഹം ഐ.സി.യുവിലായിരുന്നു.

അര്‍ജന്റനീയന്‍ ഫുട്‌ബോള്‍ താരം ഡീഗോ മറഡോണയുടെ മരണത്തിന് തൊട്ടുപിന്നാലെയാണ് അര്‍ജന്റീനിയന്‍ ആരാധകരെ വീണ്ടും ദുഃഖത്തിലാഴ്ത്തി സാബെല്ലയുടെ മരണവാര്‍ത്തയും വരുന്നത്. 1980ല്‍ മറഡോണയും സാബെല്ലയും അര്‍ജന്റീനയക്ക് വേണ്ടി ഒരുമിച്ച് കളിച്ചിരുന്നു.

2020ല്‍ ഫുട്‌ബോളിനേറ്റ മറ്റൊരു നഷ്ടമാണ് സാബെല്ലയുടെ വിയോഗമെന്ന് അദ്ദേഹത്തിന്റെ ടീം മേറ്റും മുന്‍ ഗോള്‍കീപ്പറുമായ ഉബാള്‍ഡോ ഫില്ലോള്‍ പറഞ്ഞു. അര്‍ജന്റീനയെ ലോകകപ്പ് ഉയര്‍ത്താന്‍ സഹായിച്ച മികച്ച കോച്ചുകൂടിയായിരുന്നു അദ്ദേഹമെന്നും ഉബാള്‍ഡോ കൂട്ടിച്ചേര്‍ത്തു.