ആലപ്പുഴ : ചേര്‍ത്തല നഗരസഭയില്‍ ബി.ജെ.പി അട്ടിമറി വിജയം നേടിയപ്പോള്‍ പാലമേല്‍ പഞ്ചായത്തിലെ ആദിക്കാട്ടുകുളങ്ങരയില്‍ സി.പി.എം നേടി.
നഗരസഭയിലെ 13 ാം വാര്‍ഡായ സിവില്‍ സ്റ്റേഷന്‍ വാര്‍ഡില്‍ നിന്നുമാണ് ബി.ജെ.പിയിലെ ജ്യോതിഷ് ഭട്ട് 316 വോട്ടുകള്‍ നേടി വിജയിച്ചത്. ആകെയുള്ള 791 വോട്ടര്‍മാരില്‍ 662 പേരാണ് വോട്ട് ചെയ്തത്. എല്‍.ഡി.എഫ് സ്വതന്ത്ര സ്ഥാനാര്‍ഥി  ജി ഗോപിനാഥ പൈക്ക് 182 ഉം  യു.ഡി.എഫ് സ്ഥാനാര്‍ഥി അജിത് ചാരങ്കാട്ടിന് 164 ഉം വോട്ടുകള്‍ ലഭിച്ചു.
രണ്ടാം സ്ഥാനത്തെത്തിയ എല്‍.ഡി.എഫ്  സ്ഥാനാര്‍ഥിയെക്കാള്‍ 134 വോട്ടിന്റെ ഭൂരിപക്ഷത്തിലാണ് ജ്യോതിഷിന്റെ വിജയം. നഗരസഭ ഭരണം കയ്യാളുന്ന യു.ഡി.എഫിന്റെ സ്ഥാനാര്‍ഥി മൂന്നാം സ്ഥാത്തേക്ക് പിന്തള്ളപ്പെട്ടു. സ്വതന്ത്രനായ എം ജയശങ്കര്‍ കൗണ്‍സിലര്‍ സ്ഥാനം രാജിവെച്ചതിനെ തുടര്‍ന്നാണ് തെരഞ്ഞെടുപ്പ് വേണ്ടിവന്നത്.
കഴിഞ്ഞ തിരഞ്ഞെടുപ്പില്‍ ജ്യോതിഷ് 119 വോട്ടു നേടി നാലാം സ്ഥാനത്ത് എത്തി ശക്തമായ സാന്നിദ്ധ്യം അറിയിച്ചിരുന്നു.
ഇരുമുന്നണികളും തങ്ങള്‍ക്ക് കഴിഞ്ഞതവണ ലഭിച്ച വോട്ടിനെക്കാളും നില മെച്ചപ്പെടുത്തിയെങ്കിലും വിജയം കനിഞ്ഞില്ല. എന്നാല്‍ കഴിഞ്ഞ തെരഞ്ഞെടുപ്പില്‍ രണ്ടാം സ്ഥാനത്തായിരുന്ന യു.ഡി.എഫ്  മൂന്നാം സ്ഥാനത്തേക്ക് പിന്തള്ളപ്പെട്ടത് അവര്‍ക്ക് ക്ഷീണമായി.  
നേരിയ ഭൂരിപക്ഷം മാത്രമുള്ള നഗരസഭയിലെ യു.ഡി.എഫ് ഭരണത്തെ  വിജയ പരാജയങ്ങള്‍ സ്വാധീനിക്കില്ലെങ്കിലും വിദ്യാഭ്യാസ സ്ഥിരം സമിതി നിലനിര്‍ത്താന്‍ യു.ഡി.എഫിനു വിജയം അനിവാര്യമായിരുന്നു. ഇനി  ജയിച്ച ബി.ജെ.പി സ്ഥാനാര്‍ഥിയുടെ തീരുമാനം നിര്‍ണായകമാകും.
പാലമേല്‍ ഗ്രാമപഞ്ചായത്തില്‍ ആദിക്കാട്ടുകുളങ്ങര വാര്‍ഡ് 10 ല്‍ സി.പി.എം. സ്ഥാനാര്‍ഥി ഷൈലജ 708 വോട്ടു നേടി വിജയിച്ചു.
കോണ്‍ഗ്രസ് സ്ഥാനാര്‍ഥി ഷീജ 571 വോട്ടു നേടി.  ബി.ജെ.പി. സ്ഥാനാര്‍ഥി സുശീല മണിയമ്മയ്ക്ക് 14 വോട്ടുകള്‍ മാത്രമാണ് നേടാനായത്.