യുവന്റസ്-3 ബാഴ്‌സലോണ

കാമ്പ്‌നൗ: ചാമ്പ്യന്‍സ് ലീഗില്‍ ബാഴ്‌സിലോണക്കെതിരെ തകര്‍പ്പന്‍ ജയവുമായി യുവന്റസ്. ക്രിസ്റ്റ്യാനോ റൊണാള്‍ഡോയുടെ ഇരട്ട ഗോള്‍ മികവില്‍ എതിരില്ലാത്ത മൂന്ന് ഗോളിനാണ് യുവന്റസ് ജയം. ഗ്രൂപ്പില്‍ ബാഴ്‌സയെ മറികടന്ന് യുവന്റസ് ഒന്നാം സ്ഥാനത്തെത്തി.

കളിയുടെ തുടക്കം മുതല്‍ തന്നെ കൃത്യമായ ആധിപത്യം പുലര്‍ത്താന്‍ യുവന്റസിനായി. തുടക്കത്തില്‍ തന്നെ ഹൈ പ്രസിങ്ങും അഗ്രസീവ് അറ്റാക്കിങ്ങും കൊണ്ട് ഇറ്റാലിയന്‍ ക്ലബ് കളം നിറഞ്ഞു. പതിനഞ്ചാം മിനുറ്റില്‍ തന്നെ പെനാല്‍റ്റിയും ലഭിച്ചു. ആദ്യ ഗോള്‍ റൊണാള്‍ഡോയുടെ വക.

ഒട്ടും വൈകാതെതന്നെ അടുത്ത ഗോളും പിറന്നു. ഇരുപതാം മിനുറ്റില്‍ വെസ്റ്റണ്‍ മക്കെന്നിയിലൂടെ രണ്ടാം ഗോള്‍. കളിയുടെ താളം തെറ്റിക്കാനും ബാഴ്‌സലോണയെ സമ്മര്‍ദത്തിലാക്കാനും യുവന്റസിന് അത് ധാരാളമായിരുന്നു. പിന്നീടെല്ലാം യുവന്റസിന് എളുപ്പമായി. കൗണ്ടര്‍ അറ്റാക്കിന് തക്കം പാര്‍ത്തിരിക്കുകയായിരുന്നു യുവന്റസ് ചെയ്തത്. ഈ സമയം നിരവധി അവസരങ്ങള്‍ ലഭിച്ചെങ്കിലും അതൊന്നും പൂര്‍ണതയിലേക്കെത്തിക്കാന്‍ മെസിക്കും കൂട്ടര്‍ക്കുമായില്ല.