ഗോള്‍ഡ് കോസ്റ്റ്: ഇന്ത്യന്‍ ബാഡ്മിന്റണ്‍ ടീം സുദിര്‍മാന്‍ കപ്പ് മിക്‌സഡ് ടീം ചാംപ്യന്‍ഷിപ്പിന്റെ നോക്കൗട്ട് ഘട്ടത്തില്‍. അവസാന ഗ്രൂപ്പ് പോരാട്ടത്തില്‍ ഇന്തോനേഷ്യ ഡെന്‍മാര്‍കിനെ 3-2ന് കീഴടക്കിയതോടെയാണ് ഇന്ത്യയുടെ ക്വാര്‍ട്ടര്‍ പ്രവേശം സുഗമമായത്. നേരത്തെ ഇന്ത്യ 4-1ന് ഇന്തോനേഷ്യയെ പരാജയപ്പെടുത്തിയിരുന്നു. ക്വാര്‍ട്ടറില്‍ കരുത്തരായ ചൈനയുമായി ഇന്ത്യ ഏറ്റുമുട്ടും. ഇത് രണ്ടാം തവണയാണ് ഇന്ത്യ സുദിര്‍മാന്‍ കപ്പിന്റെ ക്വാര്‍ട്ടറിലേക്ക് മുന്നേറുന്നത്. 2011ലാണ് ആദ്യമായി ഇന്ത്യ നോക്കൗട്ട് ഘട്ടത്തിലെത്തിയത്. അന്ന് ചൈനയോട് 1-3ന് തോറ്റ് ഇന്ത്യ പുറത്താകുകയായിരുന്നു. വീണ്ടും ചൈനയുമായാണ് ഇന്ത്യയുടെ പോരാട്ടം.
ഇന്ത്യയും ഡെന്‍മാര്‍കും ഇന്തോനേഷ്യയും ഉള്‍പ്പെട്ട ഗ്രൂപ്പ് അക്ഷരാര്‍ഥത്തില്‍ മരണ ഗ്രൂപ്പായി മാറുകയായിരുന്നു. ആദ്യ രണ്ട് സ്ഥാനങ്ങളിലുള്ള ടീമുകള്‍ നോക്കൗട്ടിലേക്ക് കടക്കും. ഡെന്‍മാര്‍ക് ഗ്രൂപ്പ് ചാംപ്യന്‍മാരായപ്പോള്‍ ഇന്ത്യ രണ്ടാം സ്ഥാനക്കാരായാണ് അടുത്ത ഘട്ടം ഉറപ്പിച്ചത്. നേരത്തെ ഇന്തോനേഷ്യക്കെതിരായ നിര്‍ണായക പോരാട്ടം വിജയിച്ച് ഇന്ത്യ സാധ്യതകള്‍ നിലനിര്‍ത്തുകയായിരുന്നു.