ിമുന്‍കൂര്‍
ജാമ്യത്തിന് ശ്രമം

സ്വന്തം ലേഖകന്‍
തിരുവനന്തപുരം: മുഖ്യമന്ത്രിയുടെ അഡിഷണല്‍ പ്രൈവറ്റ് സെക്രട്ടറി സി.എം രവീന്ദ്രന്‍ ഇന്നും ഇ.ഡിക്ക് മുന്നില്‍ ഹാജരാകില്ല. രവീന്ദ്രന്‍ ആശുപത്രിയില്‍ തന്നെ തുടരും. കടുത്ത ക്ഷീണവും അതുമായി ബന്ധപ്പെട്ട പ്രശ്‌നങ്ങളും ഉണ്ടെന്നാണ് ഡോക്ടര്‍മാരുടെ വിശദീകരണം.
തലച്ചോറിന്റെ എം.ആര്‍.ഐ സ്‌കാന്‍ എടുത്തതിനുശേഷം മാത്രമേ ചികിത്സ എന്താണെന്ന് പറയാന്‍ കഴിയൂവെന്നാണ് ഡോക്ടര്‍മാര്‍ പറയുന്നത്.
കൊവിഡാനന്തര ആരോഗ്യപ്രശ്‌നങ്ങള്‍ ചൂണ്ടിക്കാട്ടിയാണ് ഇപ്പോള്‍ രവീന്ദ്രന്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സതേടിയത്. നേരത്തെ കൊവിഡ് ഭേദമായതിനുശേഷവും ആശുപത്രിയില്‍ തുടര്‍ന്ന രവീന്ദ്രനോട് ചോദ്യംചെയ്യലുമായി സഹകരിക്കാന്‍ സി.പി.എം സംസ്ഥാന നേതൃത്വം നിര്‍ദേശിച്ചിരുന്നു.
തുടര്‍ന്ന് ആശുപത്രിവിട്ട് വീട്ടില്‍ ചികിത്സ തുടര്‍ന്നെങ്കിലും കഴിഞ്ഞദിവസം തലവേദനയും കടുത്ത ക്ഷീണവുമാണെന്നുപറഞ്ഞ് വീണ്ടും മെഡിക്കല്‍ കോളജില്‍ പ്രവേശിക്കുകയായിരുന്നു. രവീന്ദ്രനെ ഇ.ഡി അറസ്റ്റ് ചെയ്താല്‍ മൂന്നാംഘട്ട തെരഞ്ഞെടുപ്പില്‍ കനത്ത തിരിച്ചടി ഉണ്ടാകുമെന്ന് മുന്നില്‍ക്കണ്ട് പാര്‍ട്ടി നിര്‍ദേശപ്രകാരമാണ് വീണ്ടും ആശുപത്രിയില്‍ അഡ്മിറ്റായതെന്നും സൂചനയുണ്ട്. അതിനിടെ, രവീന്ദ്രന്‍ മുന്‍കൂര്‍ ജാമ്യവുമായി ബന്ധപ്പെട്ട് നിയമോപദേശം തേടിയിട്ടുണ്ട്. സര്‍ക്കാരിന്റെ വിവിധ പദ്ധതികളുമായി ബന്ധപ്പെട്ട് രവീന്ദ്രന്‍ ശിവശങ്കറുമായി ചേര്‍ന്ന് നടത്തിയ ഇടപാടുകളാണ് സംശയനിഴലില്‍ നില്‍ക്കുന്നത്.
മൂന്നാംവട്ടം നോട്ടിസ് നല്‍കിയപ്പോഴും രവീന്ദ്രന്‍ ആശുപത്രിയില്‍ അഡ്മിറ്റായത് അന്വേഷണത്തില്‍ നിന്ന് ഒഴിഞ്ഞുമാറാനുള്ള ശ്രമത്തിന്റെ ഭാഗമാണെന്നാണ് ഇ.ഡിയുടെ വിലയിരുത്തല്‍. ഡോക്ടര്‍മാരില്‍ നിന്ന് ആരോഗ്യവിവരങ്ങള്‍ തിരക്കിയശേഷം രവീന്ദ്രനെ കസ്റ്റഡിയിലെടുക്കാനാണ് ഇ.ഡിയുടെ തീരുമാനമെന്നും സൂചനയുണ്ട്.