അരീക്കോട്: മൂന്ന് വര്‍ഷം മുന്‍പ് ആദിവാസി വീട്ടമ്മ പൊള്ളലേറ്റ് മരിച്ച കേസില്‍ ഭര്‍ത്താവ് പൊലിസ്  കസ്റ്റഡിയില്‍. അരീക്കോട്  ആലപ്പാറ സി.എ രാജ(38)നെയാണ് അരീക്കോട് എസ്.ഐ കെ. സിനോദിന്റെ നേതൃത്വത്തിലുള്ള പൊലിസ് കസ്റ്റഡിയിലെടുത്തത്. വെറ്റിലപ്പാറ ആലാപ്പാറ ശാന്തയാണ്  പൊള്ളലേറ്റ് മരിച്ചിരുന്നത്. പൊള്ളലേറ്റ് രണ്ടു മാസത്തോളം  ചികിത്സയിലിരിക്കെ 2014 സെപ്തംബര്‍ എട്ടിനാണ് ശാന്ത മരിച്ചത്.
2014 ജൂലൈ 14നായിരുന്നു കേസിനാസ്പദമായ  സംഭവം. സംഭവം നടക്കുമ്പോള്‍ പത്താം തരത്തില്‍ പഠിച്ചിരുന്ന മൂത്ത കുട്ടി സ്‌പെഷല്‍ ക്ലാസിനായി സ്‌കൂളില്‍ പോയതായിരുന്നു. ഈ സമയം ഒന്‍പതും നാലും വയസ് പ്രായമുള്ള ഇളയ കുട്ടികള്‍ മാത്രമാണ് വീട്ടിലുണ്ടായിരുന്നത്. സംഭവം നേരില്‍ കണ്ട രണ്ടാമത്തെ കുട്ടി പേടികാരണം പുറത്ത് പറഞ്ഞിരുന്നില്ല. കുട്ടിയുടെ മൊഴിയുടെ അടിസ്ഥാനത്തിലാണ് ഇപ്പോള്‍ അന്വേഷണം നടക്കുന്നത്. ജില്ലാ പൊലിസ് മേധാവി ദേബേഷ്‌കുമാര്‍ ബെഹ്‌റയുടെ നിര്‍ദേശ പ്രകാരം ഡിവൈ.എസ്.പി ജലീല്‍ തോട്ടത്തിലിന്റെ മേല്‍നോട്ടത്തില്‍ അരീക്കോട് എസ്.ഐ കെ. സിനോദാണ് കേസ് അന്വേഷിക്കുന്നത്.