ബാഴ്‌സലോണ: ഫ്രഞ്ച് സൂപ്പര്‍ താരം അന്റോയിന്‍ ഗ്രിസ്മാന്‍ ഇനി ബാഴ്‌സലോണക്ക് സ്വന്തം. ഇതോടെ ഏറെ നാളായി നിലനില്‍ക്കുന്ന അഭ്യൂഹങ്ങള്‍ക്ക് വിരാമമായി. ഇന്നലെ അത്‌ലറ്റികോ മാഡ്രിഡിന് ഗ്രിസ്‌മെന്റെ റിലീസ് ക്ലോസ് നല്‍കി ബാഴ്‌സലോണ ട്രാന്‍സ്ഫര്‍ പൂര്‍ത്തിയാക്കിയതോടെയാണ് ഗ്രിസ്മാന്റെ ബാഴ്‌സയിലേക്കുള്ള ചുവട് മാറ്റം പൂര്‍ത്തിയായത്. അത്‌ലറ്റികോയിലേതിനേക്കാള്‍ കുറഞ്ഞ മൂല്യത്തിനാണ് ഗ്രിസ്മാന്‍ ബാഴ്‌സലോണയിലെത്തിയിട്ടുള്ളത്.
ഗ്രിസ്മാന്റെ വരവോടെ വലിയ ശക്തിയായി ബാഴ്‌സലോണ മാറും. അത്‌ലറ്റിക്കോ മാഡ്രിഡ് വിടുമെന്ന് നേരത്തെ തന്നെ അറിയിച്ച ഗ്രിസ്മാന്‍ ട്രാന്‍സ്ഫര്‍ വേഗത്തിലാക്കാന്‍ അത്‌ലറ്റിക്കോ മാഡ്രിഡിന്റെ പ്രീസീസണ്‍ ക്യാംപില്‍ പങ്കെടുത്തിരുന്നില്ല.
അവസാന അഞ്ചു വര്‍ഷമായി അത്‌ലറ്റികോ മാഡ്രിഡിലെ ഏറ്റവും പ്രധാന താരമായിരുന്നു ഗ്രിസ്മാന്‍. അത്‌ലറ്റിക്കോ മാഡ്രിഡിനായി 255 മത്സരങ്ങള്‍ കളിച്ചിട്ടുള്ള ഗ്രിസ്മാന്‍ 133 ഗോളുകളും 43 അസിസ്റ്റും സ്വന്തമാക്കിയിട്ടുണ്ട്.