ഇരിട്ടി: യൂത്ത് കോണ്‍ഗ്രസ് പേരാവൂര്‍ മണ്ഡലം സെക്രട്ടറി പായം വട്ടിയറ കരിയാലിലെ ജിജോ പുളിയാനിക്കാട്ടി(38)നെ വെട്ടിക്കൊലപ്പെടുത്താന്‍ ശ്രമിച്ച സംഭവത്തില്‍ സി.പി.എം പ്രവര്‍ത്തകന്‍ അറസ്റ്റില്‍. വട്ടിയറ എരുമത്തടത്തിലെ സി. ജയചന്ദ്ര(34)നെയാണ് ഇരിട്ടി പൊലിസ് പിടികൂടിയത്. മറ്റു പ്രതികളെ കണ്ടെത്താന്‍ പൊലിസ് വട്ട്യറ, കരിയാല്‍ ഭാഗത്ത് വ്യാപക പരിശോധന നടത്തിവരികയാണ്. അക്രമിച്ചത് മുഖംമൂടി സംഘമാണെന്ന് ജിജോ പറയുന്നതിനാല്‍ പ്രതികളെകുറിച്ച് വ്യക്തത വരുത്തിയ ശേഷമാണ് പൊലിസ് പ്രതിപട്ടികയില്‍ ഉള്‍പെടുത്തിയിരിക്കുന്നതെന്നും ജയചന്ദ്രന്‍ ഉള്‍പ്പെടെ കേസില്‍ അഞ്ച് പ്രതികളാണുള്ളതെന്നും പൊലിസ് പറഞ്ഞു.കരിയാലില്‍ മൃതദേഹത്തില്‍ റീത്ത് വച്ചത് എടുത്ത് മാറ്റിയതുമായി ബന്ധപ്പെട്ട തര്‍ക്കമാണ് വധശ്രമത്തിലേക്ക് വഴിമാറിയതെന്നാണ് പൊലിസ് കണ്ടെത്തല്‍. അക്രമത്തില്‍ മാരകമായി പരുക്കേറ്റ ജിജോ മംഗളൂരുവിലെ ആശുപത്രിയില്‍ ചികിത്സയിലാണ്.