ചേര്‍ത്തല: മുന്‍ മന്ത്രി ദാമോദരന്‍ കാളാശേരി (88) അന്തരിച്ചു. എറണാകുളത്തെ സ്വകാര്യ ആശുപത്രിയില്‍ ഇന്നലെ പുലര്‍ച്ചെയായിരുന്നു അന്ത്യം. 1970ലും 1977ലും പന്തളം നിയമസഭാ മണ്ഡലത്തില്‍ നിന്ന് എം.എല്‍.എ ആയി തെരഞ്ഞെടുക്കപ്പെട്ട ദാമോദരന്‍ കാളാശേരി 1978ല്‍ പി.കെ വാസുദേവന്‍ നായര്‍ മന്ത്രിസഭയില്‍ പട്ടികജാതി, ദേവസ്വം, സാമൂഹ്യക്ഷേമ വകുപ്പ് മന്ത്രിയായിരുന്നു. പട്ടികജാതി വിഭാഗത്തിന് പി.എസ്.സി അപേക്ഷ സൗജന്യമാക്കിയതും തിരുവനന്തപുരം വെള്ളയമ്പലത്ത് അയ്യങ്കാളി പ്രതിമ സ്ഥാപിക്കുവാന്‍ സ്ഥലം ഏറ്റെടുത്തതും കാളാശേരി മന്ത്രിയായിരിക്കുമ്പോഴാണ്.
പട്ടികജാതി വര്‍ഗ കോര്‍പറേഷന്‍ ചെയര്‍മാന്‍, കേന്ദ്രത്തിനുകീഴിലെ ഡോ.അംബേദ്കര്‍ ഫൗണ്ടേഷന്‍ ബോര്‍ഡ് അംഗം, കെ.പി.സി.സി ജനറല്‍സെക്രട്ടറി, എ.ഐ.സി.സി.സി അംഗം എന്നീ നിലകളിലും പ്രവര്‍ത്തിച്ചിട്ടുണ്ട്. ഭാരത് ധ്വനി ആഴ്ചപ്പതിപ്പിന്റെയും രാഷ്ട്രശബ്ദം ദ്വൈവാരികയുടെയും പ്രിന്ററും പബ്ലിഷറുമായിരുന്നു. സംസ്‌കാരം ഇന്ന് ഉച്ചക്ക് 12ന് ചേര്‍ത്തല നഗരസഭ പതിനൊന്നാംമൈലിന് സമീപം കാളാശേരി വീട്ടില്‍ ഔദ്യോഗിക ബഹുമതികളോടെ നടക്കും.റിട്ട.അധ്യാപിക പരേതയായ ഭാനുമതിയാണ് ഭാര്യ. മക്കള്‍: ഗിരിജ, ഗോപി കാളാശേരി, സോജ, അജിത, സജീവ് കാളാശേരി. മരുമക്കള്‍: കെ.സദാശിവന്‍ (റിട്ട.എസ്.പി), ഡോ.തമ്പി (സഊദി), ഉഷാ കുമാരി (എസ്.ബി.ഐ,ആലപ്പുഴ), ബബിത, പരേതനായ ഡോ.പുരുഷോത്തമന്‍.
മുന്‍ മന്ത്രിയും എ.ഐ.സി.സി അംഗവുമായിരുന്ന ദാമോദരന്‍ കാളാശ്ശേരിയുടെ നിര്യാണത്തില്‍ എ.കെആന്റണി , കെ.പി.സി.സി പ്രസിഡന്റ് മുല്ലപ്പളളി രാമചന്ദ്രന്‍, പ്രതിപക്ഷനേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി, എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ എന്നിവര്‍ അനുശോചിച്ചു. എ.കെ ആന്റണിക്ക് വേണ്ടി വി.എം സുധീരന്‍ റീത്ത് സമര്‍പ്പിച്ചു. പ്രതിപക്ഷ നേതാവ് രമേശ് ചെന്നിത്തല വസതിയിലെത്തി അന്തിമോപചാരമര്‍പ്പിച്ചു.