തിരുവനന്തപുരം: പ്രശസ്ത ചലച്ചിത്ര ഛായാഗ്രാഹകന്‍ എം.ജെ രാധാകൃഷ്ണന്‍ (61) അന്തരിച്ചു. ഹൃദയാഘാതത്തെതുടര്‍ന്ന് തിരുവനന്തപുരത്തെ സ്വകാര്യ ആശുപത്രിയില്‍ ഇന്നലെ വൈകിട്ട് ഏഴോടെയായിരുന്നു അന്ത്യം. മികച്ച ഛായാഗ്രാഹകനുള്ള സംസ്ഥാന സര്‍ക്കാരിന്റെ ചലച്ചിത്രപുരസ്‌കാരം ഏഴു തവണ ലഭിച്ച ഇദ്ദേഹം നിരവധി അന്താരാഷ്ട്ര അവാര്‍ഡുകള്‍ക്കും അര്‍ഹനായിട്ടുണ്ട്.
തുടക്കത്തില്‍ സ്റ്റില്‍ ഫോട്ടോഗ്രാഫറായിരുന്ന എം.ജെ രാധാകൃഷ്ണന്‍ പിന്നീട് ഷാജി എന്‍. കരുണിന്റെ കീഴില്‍ അസോസിയേറ്റ് കാമറാമാനായി. അടൂര്‍ ഗോപാലകൃഷ്ണന്‍ മുതലുള്ള സംവിധായകരുടെ സിനിമകളില്‍ എം.ജെ രാധാകൃഷ്ണന്റെ ഛായാഗ്രാഹണ മികവ് കാണാം. 1999ല്‍ കാന്‍ ചലച്ചിത്ര മേളയില്‍ മരണ സിംഹാസനം എന്ന ചിത്രത്തിലൂടെ ഗോള്‍ഡന്‍ കാമറ അവാര്‍ഡും നേടി. 1996ല്‍ ജയരാജിന്റെ ദേശാടനത്തിലൂടെയായിരുന്നു ആദ്യ സംസ്ഥാന അവാര്‍ഡ്. പുനലൂര്‍ തൊളിക്കോട് ശ്രീനിലയത്തില്‍ ജനാര്‍ദനന്‍ വൈദ്യരുടെയും പി. ലളിതയുടെയും മകനാണ്. ഭാര്യ ശ്രീലത. മക്കള്‍: യദു, നീരജ.