കുന്നംകുളം: പെരുമ്പിലാവ് തണത്തറപാലത്തിന് സമീപം നിര്‍മാണം നടക്കുന്ന വീടിനു മുന്നില്‍ മാലിന്യം നിക്ഷേപിച്ചതായി പരാതി. കോഴിയുടെ അറവ് മാലിന്യമാണ് ചാക്കില്‍ കെട്ടിയ നിലയില്‍ നിക്ഷേപിച്ചിരിക്കുന്നത്. വലിയ 50 ചാക്കുകളിലാണ് മാലിന്യം കൊണ്ടു വന്നിട്ടിരിക്കുന്നത്.
രാവിലെ ദുര്‍ഗന്ധം മൂലം പരിസരവാസികളാണ് ഇത് ശ്രദ്ധിച്ചത്. തുടര്‍ന്ന് വീട്ടുകാരെ വിളിച്ചു വരുത്തുകയായിരുന്നു. നിര്‍മാണം നടന്നു കൊണ്ടിരിക്കുന്ന റോഡരികി ലുള്ള വീടിന്റെ മുറ്റത്തായാണ് മാലിന്യം ഇട്ടിരിക്കുന്നത്.
നിരന്തരം മാലിന്യം ഉപേക്ഷിക്കപെടുന്ന രീതി കുറഞ്ഞ് വന്നിരിക്കുകയായിരുന്നു. എന്നാല്‍ കഴിഞ്ഞ രണ്ടാഴ്ചയോളമായി മേഖലയിലെ പലയിടങ്ങളിലും ഇത്തരത്തില്‍ മാലിന്യങ്ങള്‍ ചാക്കിലാക്കി കൊണ്ടുവന്നിടുന്നത് പതിവായിട്ടുണ്ട്. പൊലിസ് സ്ഥലത്തെത്തി പരിസരത്തുള്ള അറവ്ശാലകളില്‍ നിന്ന് മാലിന്യം കൊണ്ട് പോകുന്നവരെ കുറിച്ചുള്ള വിശദാംശങ്ങള്‍ ശേഖരിച്ചു. പഞ്ചായത്ത് ആരോഗ്യ വിഭാഗം ഉദ്യോഗസ്ഥരും സ്ഥലത്തെത്തി. മാലിന്യം നിക്ഷേപിച്ചത് സംബന്ധിച്ച് കേസെടുത്തതായും പൊലിസ് പറഞ്ഞു.